Исроил мудофаа армияси Байрутдаги “Ҳизбуллоҳ” марказий штабига зарба берди

Исроил ҳарбийлари “Ҳизбуллоҳ” ҳааркатининг Байрутдаги марказий штабига зарба берди, дея хабар беради Исроил мудофаа армияси (ЦАХАЛ)нинг телеграм канали.

“Бир мунча вақт олдин “ЦАХАЛ” Байрутдаги Даҳия марказида жойлашган турар-жой бинолари орасидаги “Ҳизбуллоҳ” террорчилик ташкилотининг марказий қароргоҳига нуқтали зарба берди”, — дейилади Исроил армиясининг хабарида.

Исроилнинг Ynet портали хабар беришича, зарба нишони “Ҳизбуллоҳ” етакчиси Ҳасан Насруллоҳ бўлган. Бироқ, портлаш вақтида унинг бинода бўлгани ёки бўлмагани ҳозирча номаълум, дея қайд этади Х ижтимоий тармоғида Исроил армияси радиоси.

Al Jazeera мухбирининг хабар беришича, Даҳиядаги Ҳарет Хрейк муниципалитетида “катта вайронагарчиликлар” бўлган, тўртта бино бутунлай вайрон бўлган.