Кремль амалдорларни Украина билан урушни якунлашга тайёрлашни бошлади

Россия президенти маъмурияти ҳудудий амалдорлар орасида Украина билан урушдаги «ғалаба тимсоли» стратегиясини шакллантиришга киришди, улар бу стратегияни жамоатчиликка етказишлари керак. Бу мавзу Москва яқинидаги “Сенеж” бошқаруви устахонасида ўтказилган губернатор ўринбосарлари учун семинарда асосий мавзуга айланди, деб ёзади “Коммерсант” хабардор манбаларга таяниб.

Нашрнинг ёзишича, Кремль можаронинг тугаши муқаррар деб ҳисобламоқда ва жамоатчилик натижаларни ғалаба сифатида қабул қилишини олдиндан тайёрлаши муҳим. Асосий эътибор фуқароларнинг «хотиржам кўпчилиги»га қаратилган бўлиб, улар президент томонидан белгилаб берилган мақсадлар – “денацификация”, “демилитаризация” ва Украинанинг тўртта ҳудудини босиб олиш – муваффақиятига ишонч ҳосил қилишлари керак.

Бундан ташқари, ҳудудий ҳукуматларга уруш қатнашчиларининг норозилик ҳаракатлари ёки жиноий гуруҳларга қўшилиб кетишининг олдини олиш мақсадида улар билан фаолроқ ишлаш, жумладан, уларни реабилитация қилиш ва ишга жойлаштириш бўйича топшириқлар берилди.