“Крокус”даги терактни уюштиришда кўплаб россияликлар қатнашгани аниқланди

“Росфинмониторинг” Москва яқинидаги “Крокус Сити Холл” концерт залида терактни ташкил этишда турли мамлакатлар вакиллари, жумладан, россияликлар иштирок этганини маълум қилди, деб ёзади “Коммерсантъ”.

Идора бошлиғи Юрий Чиханчин ҳужум халқаро гуруҳ томонидан пухта режалаштирилгани, аммо тергов давом этаётгани сабабли тафсилотлар ошкор этилмаганини таъкидлади.

“Бу Марказий Осиё, Европа давлатларининг вакиллари ва россияликлардан иборат халқаро жамоа бўлган”, – деди Чиханчин Федерация Кенгашининг Бюджет ва молия бозорлари қўмитаси йиғилишида.

Чиханчин “Крокус”даги теракт ва ундан кейин Доғистондаги теракт “Росфинмониторинг” фаолиятини яхшилаш зарурлигини кўрсатганини таъкидлади. Департамент Ички ишлар вазирлиги, ФХХ ва прокуратура билан биргаликда террорчиларнинг хатти-ҳаракатлари модели устида ишламоқда.

Ҳужум 22 март куни кечқурун, қуролли шахслар “Крокус Сити Холл” биносига бостириб кириб, ўт очган пайтда содир бўлган. Унда 140 дан ортиқ одам ҳалок бўлди, 50 дан ортиқ киши жабрланди. Отишмадан сўнг террорчилар бинога ўт қўйган, бироқ тез орада қўлга олинган.

Ҳужум учун жавобгарликни Россияда тақиқланган “Ислом давлати” террорчилик ташкилоти билан боғланган “Вилоят Хуросон” гуруҳи ўз зиммасига олди. Шунингдек, Россия расмийлари терактда Украинанинг ҳам иштироки борлигини даъво қилмоқда, бироқ Киев буни рад этмоқда.