Курскда марказий авиация-техника базаси бир неча соат давомида ёнди

Курск марказида бир неча соат давомида ўчириш имкони бўлмаган ёнғин 3754-Марказий авиация техник базаси жойлашган 13830-ҳарбий қисм ҳудудида содир бўлди. Ёнғин жойининг геолокацияси CyberBoroshno лойиҳасининг OSINT мутахассислари томонидан аниқланган.

Шу билан бирга, Мудофаа вазирлиги кечаси Курск областида уриб туширилган бирорта дрон ҳақида хабар бермаган. Област маъмурияти ҳам ёнғин сабаблари ва ёнғиннинг аниқ жойини маълум қилмаган.

2023 йил август ойида 13830-ҳарбий қисмдан юзлаб метр узоқликда самолёт типидаги дрон уриб туширилганди – у турар-жой биносига қулаганди. Ўшанда “Агентлик” Wikimapia  сайтида ушбу ҳарбий қисм ҳақида шарҳни топганди.

“1990 йилларда мен бу ерда олти ой хизмат қилганман. Катта хўжалик-юк ташиш базаси, у ерда михлар, шиферлар, бўёқлардан тортиб мис таёқчалар ва видеомагнитофонларгача ҳамма нарса бор эди. Савдо айланмаси йилига 5 минг вагонни ташкил этади”, — деб ёзган хизмат фойдаланувчиларидан бири 13830-ҳарбий қисм ҳақида.

16-радиоэлектрон кураш бригадаси ҳам бўлинмага туташ манзилда жойлашган, дея таъкидлайди “Агентлик”.

2017 йилда 16-радиоэлектрон кураш бригадасининг бир қисми сифатида улар ҳарбийлар «радиоэлектрон кураш бўйича махсус кучлар» деб атаган дронларга қарши тактик бўлинмани тузган.

Аввалроқ Курск областининг губернатори Алексей Смирнов Курск марказидаги ёнғин маҳаллийлаштирилганини маълум қилганди. Уни ўчириш учун Фавқулодда вазиятлар вазирлигининг 10 та махсус техникаси ва 60 нафар ходими жалб этилган.