Оқ уй ва Пентагон Россия ҳарбий кемаларининг АҚШ яқинидаги портга кириши бўйича изоҳ берди

АҚШ Россия ҳарбий кемалари Кубанинг Гавана портига кириши муносабати билан ҳеч қандай ҳарбий таҳдид кўрмаётганини маълум қилди. Бу ҳақда Reuters агентлигига таяниб, “Европейская правда” нашри ёзади.

Россия флотининг “Адмирал Горшков” фрегати ва Россия флотининг “Казань” атом сув ости кемаси чоршанба куни Гавана портига кирган. Уларга буксир ва ёнилғи ташувчи кема ҳамроҳ бўлган.

Россиянинг тўртта кемаси Атлантика океанида “юқори аниқликдаги ракета қуроллари” ёрдамида машғулотлар ўтказганидан сўнг Кубага жўнаб кетди, дея хабар берди Россия Мудофаа вазирлиги чоршанба куни. Вазирлик хабарига кўра, сув ости кемаси ва фрегати “Циркон” гипертовушли ракеталари, “Калибр” қанотли ракеталари ва “Оникс” кемага қарши ракеталари билан жиҳозланган.

Оқ уйнинг миллий хавфсизлик бўйича маслаҳатчиси Жейк Салливан чоршанба куни журналистларга бундай денгиз машқлари одатий ҳол эканини айтди.

“Биз бунга ўхшаш нарсаларни аввал ҳам кўрганмиз ва биз шунга ўхшаш нарсаларни яна кўришни кутяпмиз, мен бундан бирон–бир мақсадни кўрмоқчи эмасман”, – дейди Салливан.

Унинг таъкидлашича, Россия Кубага ракета бергани ҳақида ҳеч қандай далил йўқ, аммо АҚШ ҳушёр бўлиб қолади.

“Биз шунга ўхшаш нарса бўлишини кутмаймиз”, дейди у қуролларнинг эҳтимолий берилиши ҳақида.

Пентагон спикерининг ўринбосари Сабрина Сингхнинг айтишича, машғулотлар АҚШ учун хавф туғдирмайди.

“Биз россияликларнинг бу борадаги режаларини кузатиб бордик. Бу кутиламган ҳолат эмас. Биз уларнинг буни қилганини кўрдик – аввал ҳам портларга бундай киришларни кўрганмиз, бу биз турли маъмуриятлар даврида кўрган одатий денгиз ташрифларидир “, дейди Сингх.

Куба ўтган ҳафта бу ташриф Гаванага дўст бўлган давлатлар ҳарбий кемалари учун одатий амалиёт эканлигини айтди. Коммунистик ҳукумат ташқи ишлар вазирлиги флот бортида ядро қуроли йўқлигини билдирди.

Гавана Флорида штатидаги Ки-Вест шаҳридан атиги 160 км узоқликда жойлашган бўлиб, у ерда АҚШ ҳарбий-денгиз кучларининг авиация базаси жойлашган. Баъзи кузатувчилар Россия ҳарбий кемаларининг Кубага ташрифини Владимир Путин Жо Байденга Москва Вашингтонга ўз таъсир доирасига қарши курашиши мумкинлигини эслатиш усули деб атамоқда.