Орбан Россия ва Хитой раҳбарлари 2024 йил охиригача Россия ва Украина ўртасида тинч музокараларни кутаётганини билдирди — El País

Виктор Орбан июль ойи бошида Россия ва Хитойга қилган ташрифлари ҳақида Европа Иттифоқига ҳисобот берди. Бу ҳақда Испания нашри Венгрия бош вазири Европа кенгаши раҳбари Шарль Мишель ва ЕИ давлатлари раҳбарларига юборган махфий маърузаларга таяниб ёзади.

Орбаннинг таъкидлашича, Россия президенти Владимир Путин ва Хитой раҳбари Си Цзинпин “Россия ва Украина ўртасида янги тинчлик музокаралари йил охиригача бўлиб ўтади, деб тахмин қилишмоқда”, деб ёзади нашр.

“Суҳбатларимга асосланиб, ҳозирда ўт очишни тўхтатиш бўйича барча эҳтимолий таклифлар ва тинчлик музокаралари бўйича йўл харитаси ижобий қабул қилинишига катта имконият борлигига ишонаман”, – дейди Орбан Москвага сафари ҳақидаги ҳисоботида. Венгрия Бош вазирининг фикрича, Европа АҚШни кутмасдан тинчлик ташаббусини “бошлаши” керак.

Орбан Хитой раҳбари билан АҚШдаги президентлик сайловларидан кейин сайланган давлат раҳбари “вазифага киришишдан олдин ҳам тезда сиёсий натижага эришиш учун босимга дуч келишини” муҳокама қилди.

Венгрия бош вазири, шунингдек, Си Цзинпинга “тинчлик музокаралари олдидан ўт очишни тўхтатиш, шунингдек, тезкор ва жадал тинчлик музокаралари янги маъмурият манфаатларига мос келиши мумкинлигини” айтди. Орбаннинг сўзларига кўра, Хитой раҳбари «бундай сценарий юзага келиши мумкинлиги ҳақида изоҳ бермаган».

Орбан Европа Иттифоқи раҳбарларини Россия ва Украина ўртасидаги музокараларда ўзини “ҳалол воситачи” деб ҳисоблаган Си Цзинпин билан мулоқотни бошлашга чақирди. У Қўшма Штатлар ва Европанинг сиёсатини «уруш сиёсати» деб атади, бунда Европа «автомат равишда Америка чизиғига эргашади».