Қозоғистонда “миллий хавфсизликка таҳдид солувчи” хорижий ОАВ аккредитация қилинмаслиги мумкин

Мажлис депутатлари “Оммавий ахборот воситалари тўғрисида”ги қонун лойиҳасига хорижий оммавий ахборот воситалари ва уларнинг вакилларини аккредитация қилиш қоидаларига оид ўзгартиришлар киритди, дея хабар беради “Радио Азаттиқ”. Таклиф этилаётган тузатишлар Қозоғистон Республикаси Ташқи ишлар вазирлигига мансабдор шахслар томонидан миллий хавфсизликка таҳдид сифатида тан олиниши мумкин бўлган хорижий нашрларни аккредитациядан ўтказишни рад этиш имкониятини беради.

Аккредитациянинг йўқлиги хорижий ОАВ ва журналистларни ўз касбий фаолиятини амалга ошириш имкониятидан маҳрум қилади. Бундан ташқари, киритилган ўзгартиришлар, агар мансабдор шахслар журналистлар фаолияти қонун ҳужжатларини бузган деб топса, суд қарорисиз хорижий нашрлар фаолиятини вақтинча тўхтатиб туриш имкониятини беради.

“Ҳуқуқий медиамарказ” вакили Гулмира Биржанова бу борада норозилигини билдирди ва унинг ташкилоти таклиф этилаётган тузатишларни қўллаб-қувватламаслигини, чунки улар жуда кенг талқин қилинган ва танланган ёндашувга олиб келиши мумкинлигини айтади.

ОАВ ҳуқуқшунослари қозоғистонлик журналистларни қонунчиликка таклиф қилинаётган ўзгартиришлар муҳокамасида фаолроқ иштирок этишга чақирмоқда. Шунингдек, улар президент Токаевдан қонуннинг ҳозирги кўринишида қабул қилинишига тўсқинлик қилишни сўрашни режалаштирмоқда.

Эслатиб ўтамиз, парламент ўтган йилнинг 30 ноябрь куни “Оммавий ахборот воситалари тўғрисида”ги қонунни биринчи ўқишда маъқуллагани экспертлар, журналистлар ва ҳуқуқ ҳимоячиларининг танқидига сабаб бўлган эди. Айни пайтда Қозоғистон Ташқи ишлар вазирлиги томонидан 36 нафар “Азаттиқ” радиоси мухбирларига аккредитация берилмаган ёки узайтирилмаган; уларнинг баъзилари 2022 йилдан бери аккредитациядан ўтишни кутишмоқда, шу боис «Азаттиқ» радиоси рад жавоби устидан судга шикоят қилишни режалаштирмоқда.