Politico: Тоғли Қорабоғдаги низо даврида Беларусь Озарбайжонга қурол етказиб берган

2018 йилдан 2022 йилгача Тоғли Қорабоғда Боку ва Ереван ўртасидаги зиддият кучайган даврда Беларусь Озарбайжонга қурол-яроғ ва ҳарбий ёрдам етказиб берган, деб ёзади Politico Беларусь томонининг сиздирилган дипломатик ва ҳарбий ҳужжатларига таяниб.

Нашр Беларуснинг ҳарбий-саноат корхоналарига қурол-яроғ экспорти бўйича давлат агентлигининг мактубларини, шунингдек, Озарбайжон учун “Гроза-С” ракетага қарши мудофаа тизимларини харид қилишни мувофиқлаштириш бўйича икки давлат ўртасидаги ёзишмаларни ўрганиб чиқди. Politico нашрининг ёзишича, Беларусдан Озарбайжонга ёрдам эски артиллерия қуролларини модернизация қилиш, шунингдек, электрон урушлар ва дронлар учун ишлатиладиган янги жиҳозларни етказиб беришни ўз ичига олган.

Politico томонидан кўрилган дипломатик хабарлардан бирида Беларусь корхоналари «Озарбайжоннинг босиб олинган ҳудудларини тиклашда, шунингдек, Беларусь товарлари ва хизматларини мамлакатга экспорт қилишда» фаол роль ўйнаши айтилган.

Беларусь ва Арманистон Россия бошчилигидаги Коллектив Хавфсизлик Шартномаси Ташкилоти – КХШТга аъзо. Қозоғистон, Қирғизистон ва Тожикистон ҳам КХШТга аъзо. Politico ёзганидек, Озарбайжонга қатор ҳарбий можароларда муҳим устунлик берган КХШТ иттифоқчисининг таъминот бўйича қарори Ереван томонидан «аччиқ хиёнат» сифатида баҳоланди.

Нашр суҳбатлашган экспертларнинг фикрича, Беларусь “Кремлнинг жимжимадор ёрдамисиз” ҳаракат қила олмайди.

“Бу жўнатмалар Москва билмаган ҳолда содир бўлиши мумкин эди ва агар Россия хоҳласа, уларни тўхтата олмасди, деб ўйлаш кулгили. Москва ҳақида гап кетганда, содиқлик деган нарса йўқ — бу ўз хавфсизлигингизни сақлаб қолиш ҳақида, ҳатто бу ўз иттифоқчилари ҳисобидан бўлса ҳам”, – дейди Ивана Страднер, Демократияни ҳимоя қилиш жамғармаси ходими.

Озарбайжон ва Беларусь ҳукуматлари изоҳ бериш сўровларига жавоб бермади.