РФ ТИВ меҳнат муҳожирларининг бўлиш муддатини қисқартиришни таклиф қилди

Россия Ички ишлар вазирлиги миграция қонунчилигини ислоҳ қилишга қаратилган янги қонун лойиҳасини тақдим этди, дея хабар беради Ирина Волкнинг Телеграм-каналида эълон қилган хабарда. Ташаббус мамлакатда чет эл фуқаролари устидан назоратни кучайтиришга қаратилган қатор чора-тадбирларни ўз ичига олади.

Қонун лойиҳасининг асосий қоидаларига чет элликларнинг Россияда бўлиш муддатини бир календарь йили давомида 90 кунгача чеклаш, чет эллик ишчиларни ёллаётган иш берувчилар устидан назорат чораларини кучайтириш, миграция қонунчилигини бузган шахсларга хизмат кўрсатишни тақиқлаш киради.

Бундан ташқари, биометрик идентификацияни жорий этиш ва Россияга кирувчи ҳар бир хорижлик учун рақамли профиль яратиш таклиф қилинмоқда. Шунингдек, қонун лойиҳаси хорижий фуқароларнинг айрим тоифалари учун назорат остида бўлиш режимини жорий қилади ва ноқонуний мигрантлар учун суддан ташқари чекловларни белгилайди.

Асосий янгиликлардан бири «содиқлик шартномаси» нинг жорий этилиши бўлиб, унга кўра чет элликлар маҳаллий қонунчиликни бузган тақдирда, Россияга кириш, қолиш ва яшаш ҳуқуқлари чекланишига рози бўлишлари керак.