РФда фирмалар дронлар ишлаб чиқаришни тез оширмоқда. Улардан бирининг ҳаммуассиси – Путиннинг қизи

Россиядаги бир қатор дрон ишлаб чиқарувчиларнинг даромади санкцияларга қарамай, урушнинг икки йилида сезиларли даражада ошди. Бу фирмалар Ғарб компанияларининг лицензияларидан фойдаланишда давом этмоқда ва уларнинг баъзилари ҳатто МДҲ мамлакатларида ўз ваколатхоналарини очган.

Санкт-Петербурглик “Геоскан” компанияси тахминан Уфадаги шўъба корхонасида жанговар дронларни ишлаб чиқаради. Компаниянинг соф фойдаси 2021 йилдан буён ўн баробар ошди, 2023 йилда давлат шартномалари ҳажми эса 206 миллион рублгача ошди. Шу билан бирга, “Геоскан” Американинг MicaSense компаниясининг рақамли камералари ва Япониянинг SONY компаниясининг видео ускуналаридан фойдаланиш лицензияларига эга. 2023 йилда ушбу компаниянинг 10% улушини Путиннинг қизи Катерина Тихонова бошчилигидаги фонд сотиб олди.

Ижевскнинг “Аэроскан” компанияси барча ижарачилар мажбуран чиқариб юборилган иккита собиқ савдо марказларида “Ланцет” ҳужумчи дронлари ва разведка дронларини ишлаб чиқаради. Ушбу компаниянинг 2021 йилдаги фойдаси 1,6 миллион рублни ташкил этган бўлса, бир йилдан сўнг у 224 миллион рублга кўтарилган. 2023 йилда Путин “Аэроскан” устахоналаридан бирига ташриф буюрди. “Аэроскан” Белгород области ҳукумати билан ушбу ҳудудда дрон ишлаб чиқаришни ривожлантириш бўйича келишув тузди – инвестициялар 40 миллиард рублни ташкил қилади.

Россия армияси учун зарба берувчи дрон тизимларини ишлаб чиқарувчи “Вега” концерни январь ойида Қирғизистон пойтахтида ўз ваколатхонасини очган эди. “Ланцет”ларни  ишлаб чиқарувчи ZALA Aero Group (“ЦСТ” МЧЖ) компанияси Қозоғистонда ўз ваколатхонасига эга.

2023 йилда “Транспорт будущего” компанияси Тольятти шаҳрида қишлоқ хўжалиги дронлари ва “бошқа мақсадларда қўллаш” учун дронларга бутловчи қисмларни серияли ишлаб чиқаришни йўлга қўйганини эълон қилди. Ўтган йили “Транспорт будущего”  компанияси Ҳиндистон микроэлектроника ишлаб чиқарувчиси Sasaa Electronics Private Limited билан Ҳиндистонда дрон ишлаб чиқаришни йўлга қўйиш бўйича меморандум имзоланди.