Россия ФВВ сув босган Орскда 1121 киши эвакуация қилингани ҳақида хабар берди

Урал дарёси оқими туфайли шаҳарнинг бир қисми кучли сув остида қолган Оренбург областининг иккинчи йирик шаҳри Орскда 5 апрель оқшомидан бошлаб 1121 киши, жумладан, 331 нафар бола эвакуация қилинди. Бу ҳақда Россия Фавқулодда вазиятлар вазирлигининг (ФВВ)  матбуот хизмати хабар беради.

Бир неча соат олдин область маъмуриятининг матбуот хизмати катта рақамларни келтириб, 2 мингга яқин киши эвакуация қилингани ҳақида хабар берган эди, улардан 320 киши (85 бола) вақтинчалик жойлаштириш марказларига юборилган.

Шаҳарнинг сув тошқини зонасида 2,4 мингта уй ва 3,1 мингга яқин уй хўжаликлари мавжуд. “Ишлар Эски шаҳар ҳудудида ва Строитель, Никель, Лесоторговий қишлоқлари, Борисоглебский ва Оржоникидзе кўчаларида олиб борилмоқда. Аҳолини эвакуация қилиш давом этяпти. Сув аста-секин кўтарилмоқда”, — дейилади матбуот хизматининг хабарида.

Соғлиқни сақлаш вазирининг ёрдамчиси Алексей Кузнецовнинг айтишича, Орскда олтита соғлиқни сақлаш муассасаси сув тошқини зонасида жойлашган. 88 нафар бемор бошқа муассасаларга ўтказилган.