Россия Курск областининг Лотаревка аҳоли пунктидаги “С-400” дивизионига ва “Курск-Восточний” аэродромига ATACMS билан зарба берилганини тасдиқлади

Россия Мудофаа вазирлиги пресс-релизида Курск областидаги бир нечта ҳарбий нишонларга ATACMS ракеталари томонидан ҳужум қилинганини тасдиқлади. Биринчи зарба 23 ноябрь куни “С-400” зенит-ракета дивизиясининг “Лотаревка”даги позициясига берилди, дея хабар беради Мудофаа вазирлиги.

““Панцир” ҳаво мудофааси ракета тизими билан ракетага қарши жанг давомида ушбу бўлинманинг жанговар экипажи учта ATACMS ракетасини йўқ қилди, иккитаси нишонга тегди”, — дейилади хабарда.

Мудофаа вазирлигининг маълумотларига кўра, натижада ҳарбий хизматчилар жароҳатланган (уларнинг сони кўрсатилмаган), радар тизими шикастланган.

Иккинчи ҳужум 25 ноябрь куни “Курск-Восточний” аэродромида содир бўлган. Унда саккизта ATACMS ракетаси қатнашган.

“С-400” ҳаво мудофаа тизими ва “Панцир” ҳаво мудофаа тизими жанговар экипажлари томонидан еттита ракета уриб туширилди, биттаси нишонга етди. Ракета парчаларининг қулаши натижасида икки нафар ҳарбий хизматчи енгил тан жароҳати олди, инфратузилмага енгил зарар етди”, — дейилади Мудофаа вазирлиги хабарида.

Департамент, шунингдек, Курск областидаги ҳарбий нишонларга ҳужум қилган ракеталарнинг қолдиқларини ҳам кўрсатди.

Украина қуролли кучлари Бош штаби 23 ноябрь куни ATACMS зарбаси чоғида “С-400” зенит-ракета мажмуаси йўқ қилинганини даъво қилди.

OSINT таҳлилчиларининг ёзишича, “Курск-Восточний” аэродромига қилинган ҳужум пайтида камида бешта ATACMS ракетаси нишонга теккан. Аэродромнинг ўзидан ташқари, ҳужумни қайтаришга уринган “С-400” позициялари ҳам ҳужумга учраган. Натижада Курск областининг “Большое Жирово” қишлоғида жойлашган “С-400” ҳаво ҳужумидан мудофаа тизими йўқ қилинган.