Россия мудофаа вазири лавозимига номзод Белоусов тўлиб кетган ҳарбий госпиталлар ҳақида гапирди

Россияда Украинадаги уруш қатнашчиларининг даволаниши ва ижтимоий таъминоти билан боғлиқ муаммолар мавжуд, деди мудофаа вазири лавозимига номзод Андрей Белоусов Федерация кенгашидаги чиқиши чоғида. Бошқа нарсалар қаторида у ҳарбий госпиталларда каравотлар етишмаслиги ва фронтдаги аскарлар учун оддий касалхоналардан фойдаланиш имкони йўқлигини таъкидлади.

«Таътилга келган МҲА («махсус ҳарбий амалиёт«) иштирокчилари фуқаролик тиббиёт муассасаларидан ҳайдалиб, кўпинча гавжум бўлган госпиталларга юборилганда, бу мутлақо тартибсизлик, бу муаммони ҳал қилиш керак», – деди Белоусов.

Унинг сўзларига кўра, яна бир муаммо «ҳарбий хизматчиларнинг имтиёзларини тасдиқлаш билан боғлиқ ортиқча бюрократия ва қоғозбозлик». “Буни идоралараро электрон ўзаро ҳамкорлик тизими доирасида дўстона тарзда ҳал қилиниши керак”, – деди вазирликка номзод.

У уруш қатнашчиларининг қарамоғида бўлган вояга еэтмаганлар, масалан, уларнинг ака-ука ва опа-сингиллари «ҳудудлар томонидан бериладиган имтиёзлар тизимидан ташқарида қолаётган» ҳолатларга алоҳида эътибор қаратди.

Белоусов, шунингдек, Украинада жанг қилганларни уй-жой билан таъминлаш устида ишлаш зарурлигини таъкидлади.

12 май куни Россия президенти Владимир Путин ўзининг иқтисодиёт бўйича собиқ ёрдамчисини мудофаа вазири этиб тайинлашни таклиф қилди. Белоусов ҳарбий идорани 10 йилдан ортиқ бошқарган Сергей Шойгуни алмаштириши керак. Шунингдек, у ҳам армияда хизмат қилмаган, айни пайтга қадар давлат ишида ишлаган иқтисодчи ҳисобланади. Ҳукуматда Белоусов ижтимоий-иқтисодий ривожланиш йўналишларини ишлаб чиқиш, молия бозорларини давлат томонидан тартибга солиш, транспорт соҳаси, инфратузилма ва миллий лойиҳаларни амалга ошириш, хорижий инвестициялар бўйича назоратни амалга оширган.