Россияда ИИВ офисини портлатиш билан таҳдид қилган ўзбекистонлик фуқаро қўлга олинди

Санкт-Петербургда Ички ишлар вазирлигининг патент бериш идорасини портлатиб юбориш билан таҳдид қилган Ўзбекистон фуқароси қўлга олинди. Бу ҳақда “Комсомольская правда” хабар беради.

Воқеа 3 июнь куни содир бўлган. Полицияга номаълум шахс Моисеенко кўчасидаги бинони портлатиб юбормоқчи экани ҳақида хабар келиб тушган.

Маълум қилинишича, ҳуқуқ-тартибот идораларининг ходимлари бино ва унинг атрофини кўздан кечириб, хавфли ҳеч нима топмаган. Ҳеч қандай эвакуация амалга оширилмаган.

Кейинчалик ёлғон таҳдид 2 май куни Россияга ишлаш мақсадида келган 35 ёшли ишсиз ўзбекистонлик томонидан юборилгани маълум бўлган.

Эркак қўлга олиниб, унга нисбатан террорчилик ҳаракати ҳақида ёлғон хабар бериш моддаси бўйича жиноят иши қўзғатилган.