Россияда тез орада сафарбарлик бошланиши ҳақида НАТО мамлакатларида разведка маълумотлари йўқ

НАТОнинг аноним юқори мартабали мулозимига кўра, альянс разведкаси Россиянинг катта сафарбарликка тайёрланаётгани ҳақида маълумотларга эга эмас. Унинг қайд этишича, Кремль, эҳтимол, одатий ҳарбий хизматга чақириш кампанияси билан чекланиш ниятидадир, бу эса Россияга муҳим сафарбарликсиз Украинада кенг кўламли ҳужум операциясини амалга оширишга имкон бермайди.

«Россияда ҳали ҳам муваффақиятли йирик ҳужум учун зарур бўлган ўқ-дорилар ва манёвр бирликлари йўқ. Улар катта эҳтимол билан Украина Қуролли кучларини чарчатишга қаратилган ҳужумларни давом эттиришади”, – дейди “Важные истории” нашрининг суҳбатдоши.

НАТОнинг разведка маълумотларига кўра, Россия қуролли кучлари қўмондонлиги ҳанузгача қуруқликдаги операцияларни изчил ташкил эта олмайди ва ҳарбий хизматчиларнинг руҳий ҳолатини сақлай олмайди. Бироқ, Россия армияси Украина Қуролли Кучларига нисбатан ишчи кучи, ўқ-дорилар ва жиҳозлар бўйича ҳали ҳам муҳим устунликни сақлаб турибди.

“Путин ҳар қандай кенг кўламли сафарбарликни кечиктиришга ҳаракат қилмоқда. Айни пайтда унинг мамлакат ичида бошқа кўплаб муаммолари бор ва ва сайловдан кейин ҳам ўз нуқтаи назаридан куч ва ишончни намоён этиши керак”, — деди у Брюсселда НАТО мамлакатларининг ташқи ишлар вазирлари йиғилишида.

Украина президенти Владимир Зеленскийнинг 300 минг рус қўшинини сафарбар қилиш ҳақидаги сўнгги баёнотлари Кремль вакиллари томонидан рад этилди ва уларни “нотўғри” деб атади. Аввалроқ Россия армияси 100 минг аскардан иборат гуруҳ тузаётгани хабар қилинганди. Россия мудофаа вазири Сергей Шойгу ҳам 2024 йил охиригача иккита бирлашган қуролли армия ва 30 та тузилма тузиш ниятини билдирганди.