Туркия Марказий банкининг илк аёл раиси истеъфо берди

Туркия Марказий банки раҳбари Хафизе Гайе Эркан президент Ражаб Тоййиб Эрдўғондан уни ўз лавозимидан бўшатишини сўради, деб ёзади “Коммерсантъ”. У буни ўзига қарши уюштирилган кампания билан изоҳлади.

“Жамоатчиликка маълумки, сўнгги вақтларда обрўйимга путур етказиш бўйича катта кўламли кампания уюштирилганди. Оилам, устига-устак ҳали бир ярим ёшга етмаган фарзандим бу жараёндан янада кўпроқ жабр чекмаслиги учун президентга мурожаат қилиб, ўзим илк кундан ҳалоллик билан бажариб келган вазифалардан озод этишни сўрадим”, — деб ёзди Гайе Х ижтимоий тармоғида.

Марказий банк раҳбари катта эҳтимол билан ўзининг Hurriyet газетасига берган интервьюсига нисбатан жамоатчилик муносабатини назарда тутмоқда. Унда Гайе Истанбулда уй-жой ижара нархидан шикоят қилиб, Манхэттендаги нархлардан ҳам қимматлигини айтганди. Шу сабабли Марказий банк раҳбари ота-онасининг уйига кўчиб ўтишига тўғри келган.

Кейинроқ Туркия президенти Ражаб Тоййиб Эрдўғон Марказий банк раиси ўринбосари Фатиҳ Караханни муассаса раҳбари этиб тайинлади. У АҚШдаги Пенсильвания университетида ўқиб, Нью-Йорк Федерал захира банкида ишлаган. 2023 йил ёзида Марказий банк раиси ўринбосари этиб тайинланган эди.

Хафизе Гайе Эркан 2023 йил ёзида Туркия Марказий банкига раҳбар этиб тайинланган ва ушбу лавозимни эгаллаган биринчи аёлга айланган эди. Унинг даврида банк юқори инфляция фонида асосий ставкани кескин оширишни бошлади. Эркан Принстонда ўқиган, узоқ вақт АҚШда яшаб, Goldman Sachs, Marsh McLennan ва First Republic Bank каби компанияларда ишлашга улгурган.