Украина ҳукумати РФдан газ транзитини давом эттиришга тайёр

Украина ҳукумати, агар Европа давлатларидан сўров бўлса, 2024 йилдан кейин Россия Федерациясидан ўз ҳудуди орқали газ транзитини давом эттиришга тайёр, деди Украина бош вазири Денис Шмигал матбуот анжуманида.

Украина бош вазири Денис Шмигал 2024 йилда амалдаги келишув муддати тугаганидан сўнг Украина Россия газининг мамлакат орқали транзитини давом эттиришга тайёрлигини маълум қилди. Агар бундай сўров Европа давлатларидан келган бўлса, бунинг имконияти бор. Бу ҳақда Украина ҳукумати расмий сайтида эфирга узатилган матбуот анжуманида айтилган.

Шмигал Украина Россия билан бу масала бўйича музокаралар бошламаслигини, аммо европалик ҳамкорлар билан мулоқотга очиқ эканини таъкидлади. У, шунингдек, агар Европа Иттифоқи томонидан тегишли ташаббус пайдо бўлса, Украина газ транзити хизматларини кўрсатиши мумкинлигини таъкидлади.

Украина орқали транзит тизими Россия газини Ғарбий ва Марказий Европа мамлакатларига етказиб беришнинг асосий йўналиши бўлиб қолмоқда, айниқса, “Шимолий оқим” газ қувури шикастланганидан кейин. 2022 йил май ойидан бошлаб Украина орқали етказиб бериш ҳажми “ЛНР”даги “Новопсков” компрессор станциясининг ишлашини назорат қила олмаганлиги сабабли «Украина ГТС оператори» томонидан эълон қилинган форс-мажор ҳолатлари туфайли камайди. Бунга жавобан Россия томони транзит ҳажмини камайтириш учун ҳеч қандай сабаб кўрмаётганини билдирди.

2024 йил охирида амалдаги газ транзити келишуви муддати тугаши фонида Украина аввалроқ Европа давлатларининг иштирокисиз ва сўровларисиз келишувни узайтиришни истамаслигини билдирган эди.