Украина қуролли кучлари Донецкдаги полигонга HIMARS билан зарба берди – камида 50 нафар россиялик ҳарбий ҳалок бўлган

Ижтимоий тармоқлардаги хабарларга кўра, Украина қуролли кучлари (УҚК) фронт чизиғидан 30-40 км узоқликда жойлашган Донецк яқинидаги нуқтада HIMARS қурилмаларидан зарба берган. Россияликлар ушбу нуқтага зарбалар мунтазам равишда содир бўлаётганидан шикоят қилмоқда, бироқ РҚК бунга эътибор бермаяпти.

Россия ҳарбий қўмондонлиги Донецк областидаги фронтдан бир неча километр узоқликда жойлашган полигонга HIMARS ракеталарининг мунтазам келишига эътибор бермаяпти. Ижтимоий тармоқлардан олинган кадрларга кўра, зарбалардан бири 2024 йил сентябрь ойида содир бўлган. Тахминий ҳисоб-китобларга кўра, РҚК нинг 50 га яқин аскари ҳаётга мос келмайдиган жароҳатлар олган. Украинанинг ракета зарбалари тафсилотлари Кремлга қарши Телеграмдаги “Вот что” каналида хабар қилинган.

17 сентябрь куни эрталаб каналда рус аскарлари бирлашмаларига тушиши мумкин бўлган зарба ҳақида маълумот пайдо бўлган. Номаълум оператор ҳалок бўлганларнинг жасадлари ётган майдонни жимгина видеога ёзган. Шунингдек, кадрга шикастланган автомобиллар ва ҳатто мототцикл ҳам тушган. “Фокус” видеони ахлоқий сабабларга кўра чоп этмайди.

Хабар муаллифининг тушунтиришича, видео гўёки Донецк яқинида, ҳалқа йўлидан унча узоқ бўлмаган жойда тасвирга олинган (ҳозирча ҳеч қандай тасдиқ йўқ). Унинг сўзларига кўра, кадрлар РҚК аскарлари фронтдан 30-40 км узоқликда тўпланиб турган полигонга тушган  HIMARS зарбасининг оқибатидир. Зарба аниқ қачон содир бўлгани кўрсатилмаган. Шу билан бирга, қисқа видео шарҳида ушбу нуқтада зарбалар мунтазам равишда содир бўлиши, аммо қўмондонлар бунга эътибор бермаслиги ҳам қайд этилган. Канал Украинадаги уруш учун пул олмоқчи бўлган, бироқ бунинг эвазига ўлиб кетаётган россияликларга мурожаат қилади.

“ДНР” раҳбари Денис Пушилиннинг Телеграм-каналида эса машғулотлар полигонидаги воқеалар ҳақида сўзланмаган. Шунингдек, Россия Мудофаа вазирлиги каналида HIMARS зарбаси ҳақида хабар берилмаган. Украина қўмондонлиги ҳам Донецк яқинидаги РҚКнинг полигонига зарба бериш эҳтимоли ҳақида изоҳ бермаяпти.