«Вёрстка»: Украинанинг босиб олинган ҳудудларидан олиб чиқилган ғаллани Россиядан Испания, Туркия ва Озарбайжон сотиб олган

2023 йилда Россия Херсон областининг босиб олинган қисмидан қиймати олти миллион евродан ортиқ бўлган камида 30 минг тонна донни олиб чиққан ва кейин уни хориждаги компанияларга сотган. Бу ҳақда тегишли ҳужжатлардан фойдаланиш ҳуқуқини олган “Вёрстка”, “Схема” лойиҳаси ва “Беларусь тергов маркази”нинг текширувида сўз боради.

Маълумотларига кўра, қишлоқ хўжалиги маҳсулотларини экспорт қилиш учун рухсатнома Россия Федерацияси томонидан тайинланган Херсон маъмурияти раҳбари Владимир Сальдо томонидан имзоланган. 2023 йилда ўнга яқин Россия компанияси унга ушбу масала бўйича мурожаат қилган ва уларнинг барчаси маъқулланган.

Журналистлар етказиб бериш занжирини ўрганиб чиқди ва шу тариқа Россиянинг “Сим Транс Групп” компанияси Украинадан икки минг тоннадан ортиқ буғдой ва меслин олиб чиққанини аниқлади. Кейинчалик олиб чиқилган донни Озарбайжоннинг “Дима” компанияси сотиб олган.

Россиядан 25 минг тонна дон олиб чиқишга рухсат олган яна бир компания “Агро-Фрегат”. Бу сафар Туркиялик фирма харидорга айланган.

Шу билан бирга, текширувчилар аниқлаганидек, юқорида тилга олинган “Агро-Фрегат” нафақат Туркияга, балки Европа Иттифоқи мамлакати ҳисобланган Испанияга ҳам дон олиб чиққан. 2023 йил сентябрь ойида Россия компанияси Испаниянинг Cereales Y Harinas Garsan S. L компаниясига босиб олинган Қримдан 4,5 минг тонна нўхат юборган. “Агро-Фрегат” етказиб бериш фактини рад этмоқда.