Yandex’нинг собиқ ходими давлатга хиёнатда гумон қилиниб ҳибсга олинди

ФСБ собиқ Yandex ходимининг «хиёнат» иши бўйича ҳибсга олинганини эълон қилди. У Украина қуролли кучлари учун пул ўтказганликда гумон қилинмоқда. Бу ҳақда Медуза хабар беряпти.

Разведка хизматининг даъво қилишича, уруш бошланганидан кейин ҳибсга олинган шахс «Украина Қуролли Кучлари томонидан зирҳли машиналар, ўқ-дорилар, жиҳозлар ва дори-дармонларни сотиб олиш учун Украинада рўйхатдан ўтган фонд»га пул ўтказган.

ФСБ ҳисоботида таъкидланишича, «Yandex»нинг собиқ ходими «қисман сафарбарликдан яшириниб, Россия Федерацияси ҳудудини тарк этган» ва «рухсат этилмаган митингларда қатнашгани учун маъмурий жавобгарликка тортилган».

ФСБ тарқатган видеода исми кўрсатилмаган ва юзи ёпиқ маҳбус 2022 йил 27 февралда Украинанинг “Тирик бўл” жамғармасига пул ўтказганини айтади.

Ушбу жамғарма 2014 йилдан буён фаолият юритиб, армияни қўллаб-қувватлаш учун маблағ йиғиб, тиббий хизмат кўрсатиш ва ҳарбий хизматчилар ҳаётини сақлаб қолиш учун жиҳозлар, учувчисиз самолётлар ва жиҳозлар сотиб олади.