Эронда президент Раисийнинг вертолёти ҳалокати билан боғлиқ янги тафсилотлар ошкор этилди

Эрон президенти администрацияси раҳбари Ғулом Ҳусайн Исмоилий президент Иброҳим Раисий вертолёти ҳалокати билан боғлиқ янги тафсилотларни маълум қилди, деб ёзади “Коммерсантъ”. Администрация раҳбарининг ўзи бошқа вертолётда учган бўлиб, у эсон-омон қўнган. Сиёсатчининг сўзларига кўра, парвоз чоғида об-ҳаво шароитлари яхши бўлган.

“Туман йўқ эди. Эҳтимол, чуқур жарликда туман бўлгандир, аммо бизнинг парвозими траекториясида туман йўқ эди. Булутлар вертолётдан бироз баландроқда эди”, — деди у. Исмоилийнинг айтишича, Раисий вертолётининг учувчиси колоннадаги барча вертолётларга булутлар тепасига чиқиш ҳақида кўрсатма берган. Учувчилар айтилган ишни қилган. Шундан кейин тахминан 30 сония ўтиб, Исмоилий ўтирган вертолёт экипажи президент вертолёти ғойиб бўлганини сезиб қолган.

Шундан сўнг учувчи президент вертолётини топиш ёки экипаж ва йўловчилардан бирортаси билан алоқага чиқиш учун бир неча марта айланиб учган. Бир ярим дақиқа мобайнида алоқа ўрнатишга муваффақ бўлинмагач, ўша пайтдаёқ Bell 212 қулагани тахмин қилинган. Кейинроқ Эроннинг Табриз шаҳар Жума-масжиди имоми Саид Муҳаммадали ал-Ҳошим алоқага чиққан. У ғойиб бўлган вертолёт бортида бўлган ва ҳалокат ҳақида гапириб берган. У ҳаётдан кўз юмгунига қадар бир неча соат давомида алоқада бўлиб турган.

Эслатиб ўтамиз, 19 май куни Эрон президенти вертолёти қулаб тушди. 20 май куни эрталаб вертолётнинг ёниб кетган бўлаклари Озарбайжон билан чегарадан 30 км масофада жойлашган Тавил қишлоғи яқинидан топилди. Йўловчиларнинг барчаси ҳалок бўлган. Эронда ва бир қатор қўшни мамлакатларда мотам эълон қилинди.