Ўзбекистон қишлоқ хўжалиги вазирининг собиқ ўринбосари иқтисодий жиноятлари учун озодликни чеклаш жазосига ҳукм қилинди

Ўзбекистон Қишлоқ хўжалиги вазирининг собиқ биринчи ўринбосари Азимжон Назаров 4,5 йилга эркинлик чеклаш жазосига ҳукм қилинди. У икки йил муддатга ташкилотларда моддий жавобгарликка эга ва раҳбар лавозимларида ишлаш ҳуқуқидан маҳрум этилди, деб ёзади Kun.uz.

Ҳукм қачон чиқарилгани номаълум. Маълумки, собиқ вазирнинг ўринбосари 2024 йилнинг 10 январидан 21 майига қадар ҳибсда эди. У ўз айбига иқрор бўлмаган ва ҳеч қандай жиноят содир қилмаганини айтган. Бироқ суднинг таъкидлашича, Назаровнинг айби гувоҳларнинг кўрсатмалари билан тўлиқ исботланган.

Собиқ мансабдор шахс Ўзбекистон Республикаси Жиноят кодексининг 167-моддаси (“Ўзлаштириб олиш йўли билан талон-тарож қилиш ва растрата), 209-моддаси (“Мансаб сохтакорлиги”), 243-модда (“Жиноятдан олинган даромадларни легаллаштириш”), 207-моддаларида (“Хизмат бепарволиги”) назарда тутилган жиноятларни содир этганликда айбдор деб топилди.

Суд ҳукмига кўра, Назаров 2008 йилда асос солган Nazar Business and Technology компанияси орқали 562 минг доллардан ортиқ маблағни ўзлаштирганликда айбдор. У компанияни 2017 йилгача ягона асосчи ва директор сифатида бошқарган. 2017 йил 28 декабрда Назаров Инновацион ривожланиш вазири ўринбосари лавозимини эгаллаб, Nazar Business and Technology компаниясидаги раҳбарлигини бошқа шахсга ўтказган, бироқ унинг ягона таъсисчи сифатида қолган.

Суд ҳукмига кўра, Назаров ва унинг шериклари Қорақалпоғистон жанубидаги сув ресурсларини яхшилаш лойиҳаси учун Жаҳон банки томонидан ажратилган маблағларни ўзлаштирган. Улар бажарилмаган ишлар ҳақида сохта ҳисоботларни яратган.

Назаров сув хўжалиги вазирининг биринчи ўринбосари бўлиб ишлаган вақтида ўз ишига бепарволик кўрсатиб, бунинг натижасида насос станцияларини модернизация қилиш билан боғлиқ йирик лойиҳа қиймати 95,4 миллион долларга оширилиб, бюджетдан 3,7 миллиард сўмнинг асоссиз сарфланишига олиб келган (тахминан 296 минг доллар).

Суд депозит ҳисобига ўтказилган 7,079 миллиард сўм (тахминан 562 минг доллар) миқдоридаги маблағни етказилган зарарни қоплаш учун давлат фойдасига ўтказиш тўғрисида қарор қабул қилди. Шунингдек, суд Тошкент шаҳри Имом Ат-Термизий кўчасида жойлашган Nazar Business and Technology компанияси идораси сифатида фойдаланилган бинони мусодара қилиш ва қолган зарарни уни сотишдан тушган маблағнинг бир қисми билан қоплаш, қолган маблағларни эса давлат даромадига ўтказиш ҳақида ҳам қарор чиқарди.