Ўзбекистонда озиқ-овқат маҳсулотларига энг кам иш ҳақининг ярмидан кўпи сарфланади

Picodi таҳлилчилари 67 мамлакатда энг кам иш ҳақининг ўзгаришини баҳолаш, шунингдек, асосий озиқ-овқат маҳсулотлари нархлари қандай ўзгарганини таҳлил қилиш бўйича тадқиқот ўтказди. Улар, шунингдек, нетто ставка, яъни ишчилар қўлига оладиган ҳақиқий пулни ҳисобга олган ҳолда, энг кам озиқ-овқат савати нархининг энг кам иш ҳақига нисбатини кўриб чиқишди.

Тадқиқот шуни кўрсатдики, 67 мамлакатдан 58 тасида 2023 йил январидан бошлаб энг кам иш ҳақи ўзгарган. Францияда иш ҳақи тахминан 3,4 фоизга, Германияда 2,8 фоизга ва Таиландда 2,4 фоизга ошган. Бошқа томондан, Озарбайжон, Арманистон, Вьетнам ва Испания каби баъзи давлатлар энг кам иш ҳақини музлатиб қўйган ёки уни оширишга ҳали қарор қилмаган.

Энг кам иш ҳақининг энг сезиларли ўсиши Аргентина (138%) ва Туркияда (100%) қайд этилди, бу эса ушбу мамлакатлардаги юқори инфляция билан боғлиқ. Ушбу рейтингда Россия 11-ўринни эгаллади, «соф» энг кам иш ҳақи 16 741 рублга тенг, бу 2023 йил бошидаги (14 131 рубль)дан 18,5 фоизга кўпдир. Ўзбекистон 2023 йил 1 декабрдан бошлаб 14,1 фоиз ўсиш ва 922 950 сўм иш ҳақи билан 16-ўринни эгаллади.

Нон, сут, тухум, гуруч, пишлоқ, гўшт, сабзавот ва меваларни ўз ичига олган озиқ-овқат саватига келсак, Россияда ушбу маҳсулотлар тўпламининг нархи 2024 йил бошида 6533 рублни ташкил этди, бу олдинги йилга нисбатан 1,7% га кўпдир. Бу миқдор солиқлар тўлангандан кейин энг кам иш ҳақининг 39 фоизига тенг. 2023 йилда бу кўрсаткич 45,5 фоизни ташкил этди.

Қайд этилишича, Россия бу кўрсаткич бўйича 67 давлат орасида 53-ўринни, Озарбайжон эса 57-ўринни эгаллаган. Энг кам иш ҳақига нисбатан озиқ-овқат нархининг нисбатан юқорилиги Қозоғистон (54%), Вьетнам (65,6%), Арманистон (78,7%) ва Ўзбекистонда (96,1%) қайд этилган.