Зеленский: Украина ўзи ишлаб чиқарган баллистик ракетани муваффақиятли синовдан ўтказди

Украина президенти Владимир Зеленский Киевдаги матбуот анжуманида маҳаллий мудофаа корхоналарида ишлаб чиқарилган Украина баллистик ракетасининг биринчи муваффақиятли синови ҳақида маълум қилди. Унинг сўзларига кўра, синов ижобий натижа берган, бироқ у ракета ҳақидаги тафсилотларни ошкор қилмаган.

Аввалроқ, 25 август куни Зеленский, шунингдек, 700 км масофагача нишонларни уриб тушира оладиган янги Украина узоқ масофали Палянитса ракета-дронидан биринчи муваффақиятли жанговар фойдаланиш ҳақида ҳам маълум қилганди. Defense Express хабарига кўра, жабрланган ҳудудда 20 тагача Россия аэродромлари мавжуд. Ассосиатед Пресс агентлигининг хабар беришича, бу ракета Украинага иттифоқчилари билан келишилмаган ҳолда Россия ҳудудига чуқур зарбалар бериш имконини беради.

Украина Мудофаа вазири Рустем Умеров 26 август куни Киев Россиянинг душанбага ўтар кечаси содир бўлган кенг кўламли ҳаво ҳужумига жавоб тайёрлаётганини маълум қилди ва ўз ишлаб чиқарган қуроллардан фойдаланишини таъкидлади.

Июль ойида Зеленский ўзининг Телеграм-каналида биринчи марта Украинанинг “ракета дастури”ни тилга олиб, мамлакат ҳамкорлардан ракета таъминотига қарамлигини камайтириш устида фаол иш олиб бораётганини таъкидлаган эди.

Айни пайтда Украина Россияга чуқур зарба бериш учун Американинг узоқ масофали қуролларидан фойдаланиш имконияти бўйича АҚШ билан музокараларни давом эттирмоқда. Politico нашрининг ёзишича, Украина расмийлари Оқ уйга бундай рухсат берилса, зарба берилиши мумкин бўлган нишонлар рўйхатини тақдим этишни режалаштирмоқда.