Jizzax viloyatida bolalar bog‘chasi tarbiyalanuvchilari zaharlanishga gumon bilan kasalxonaga yotqizildi

2-avgust kuni Jizzax viloyatining Paxtakor tumanida xususiy bolalar bog‘chasining ikki nafar tarbiyalanuvchisi ovqatdan zaharlanish gumoni bilan kasalxonaga yotqizildi. Bu haqda Bolalar ombudsmani matbuot xizmati xabar beradi.

To‘rt va besh yoshli qizchalar yuqori isitma bilan yuqumli kasalliklar bo‘limiga yotqizilgan. Shifokorlar xuddi shu bog‘chaning yana 14 nafar bolasini ham ko‘rikdan o‘tkazgan, ammo sog‘lig‘ida hech qanday shikoyat topilmagan. Mutaxassislar bolalarga nonushta qilish uchun taqdim etilgan mahsulotlardan namunalar oldi.

Huquq-tartibot idoralari xodimlari hodisa yuzasidan tergovga qadar tekshiruv boshladi. Bolalar ombudsmani kasalxonaga yotqizilgan bolalar salomatligini nazorat qilishda davom etmoqda.