Toshkent viloyatida hokim yordamchisi va uning sherigi qamoqqa olindi
![](https://anhor.uz/wp-content/uploads/2024/06/720_460_95_2303795755.jpg)
Toshkent viloyatida hokim yordamchisi va uning sherigi noqonuniy yer sotishda ayblanib, qamoqqa olindi. Bu haqda Ichki ishlar vazirligi xabar berdi.
Qayd etilishicha, Shayxontohur tumanida o‘tkazilgan tezkor tadbir davomida 1984-yilda tug‘ilgan shaxs 1986-yilda tug‘ilgan fuqarodan 5 ming AQSH dollari miqdoridagi pullarni olayotgan vaqtda ushlangan.
U Yangiyo‘l tumanida joylashgan davlat zaxirasidagi 20 sotix yer maydonidan 4 sotixini mansabdor tanishi orqali kelgusida rasmiylashtirib berishini va’da qilib, 20 ming AQSH dollariga sotishga kelishgan holda oldindan bo‘nak (avans) sifatida olgan 5 ming AQSH dollari ashyoviy dalil sifatida rasmiylashtirilgan.
Izlanishlar davomida, uning mansabdor tanishi 1973-yilda tug‘ilgan, Yangiyo‘l tumanida hokim yordamchisi lavozimida ishlovchi shaxs ekanligi aniqlangan.
“Holat yuzasidan IIV huzuridagi Tergov departamenti tomonidan Jinoyat Kodeksining 168-moddasi (firibgarlik) 4-qismi “a” bandi bilan jinoyat ishi qo‘zg‘atilib, ikki nafar shaxs Jinoyat protsessual kodeksining 221-moddasi tartibida qamoqqa olindi. Tergov harakatlari davom ettirilmoqda”, deyiladi xabarda.
If you have found a spelling error, please, notify us by selecting that text and pressing Ctrl+Enter.
Sharhlar