Rossiya harbiylari Kursk oblastidagi do‘konni talon-taroj qilishdi

Rossiya Qurolli kuchlari nazorati ostidagi Kursk oblastining Glushkovo qishlog‘ida harbiy kiyimdagi ikki kishi uyali telefonlar do‘konini talon-taroj qildi, deya xabar beradi “Tипичный Курск” Telegram kanali.

Voqea 18-avgust kuni kechki payt sodir bo‘lgan, kuzatuv kamerasi videosida jinoyatchilar oynalarni sindirib, tovarlarni olib ketayotganini ko‘rish mumkin.

“Agentstvo” jurnalistlari gumondorlardan birining shaxsini aniqladi – u chechen bo‘linmalari jangchisi Yusuf Abdulvadudov bo‘lib chiqdi. Uning ishtirokini bilvosita Kursk oblasti gubernatori vazifasini bajaruvchining maslahatchisi Roman Alyoxin tasdiqladi, u shunday talonchilik holatlari haqida xabar berishga chaqirdi.

Eslatib o‘tamiz, avvalroq rasmiylar Ukraina qurolli kuchlarining qo‘shni Sudja tumanidagi hujumi tufayli Glushkovoni majburiy evakuatsiya qilish haqida e’lon qilgan edi. Chegara hududlarini himoya qilish uchun mas’ul bo‘lgan chechen bo‘linmalari hujumni to‘xtata olmadi, bu esa ijtimoiy tarmoqlar va urush tarafdori blogerlar orasida tanqidlarga sabab bo‘ldi.

Ukraina qurolli kuchlarining Kursk oblastidagi hujum operatsiyasi 6-avgustdan beri davom etmoqda, bu Rossiyaning 2022-yil fevralida Ukrainaga qarshi keng ko‘lamli urushi boshlanganidan beri birinchi shunday hujumga aylandi.