Soxta havolaga ishongan fuqaroning qariyb 1 yarim millon puli talon-toroj qilindi

Toshkent shahrida yashovchi 39 yoshli fuqaro N.F. ariza bilan murojaat qilib, noma’lum shaxs uning bank kartasidan 1.480.000 so‘m pullarini yashirin ravishda o‘zlashtirganligini ma’lum qilib, ushbu shaxsga nisbatan qonuniy chora ko‘rilishini so‘ragan.

Tezkor-qidiruv tadbirlari natijasida, ushbu jinoyatni Jizzax viloyatida yashovchi 29 yoshli fuqaro O.U. sodir etganligi aniqlanib, qo‘lga olindi.

O.U. soxta havola yaratib, uni “onlayn kredit” yoki “moddiy yordam olish uchun bu manzilga bank karta ma’lumotingizni kiriting” mazmunidagi soxta reklamalar bilan, turli kanal va guruhlarda tarqatib, bank karta boshqaruvini berib qo‘ygan fuqarolarning pullarini yashirin ravishda talon-toroj qilib kelgan.

Mazkur holat yuzasidan O.U.ga nisbatan Jinoyat kodeksining 169-moddasi 3-qismi “b” bandi bilan jinoyat ishi qo‘zg‘atilgan.

Jinoyat kodeksining 169-moddasi 3-qismi “b” bandidagi jinoiy xatti-harakatlar uchun 5 yildan 8 yilgacha ozodlikdan mahrum qilish jazosi nazarda tutilgan.