AirPods quloqchinlari o‘g‘irlangan 575 ming dollarlik sportkar va jinoyatchini topishga yordam berdi

AQSh politsiyasi egasi salonda qoldirgan AirPods  quloqchinlari tufayli 2023-yilda chiqarilgan qiymati 575 ming dollarlik o‘g‘irlangan Ferrari avtomobilini topdi. Bu haqda Apple Insider portali xabar beradi.

Politsiya quloqchinlarni yoqilg‘i quyish shoxobchasigacha kuzatib borgan. Gumonlanuvchi qochishga muvaffaq bo‘lgan bo‘lsa-da, uning shaxsi boshqa yo‘qolgan qurilma – shaxsiy iPhone orqali tezda aniqlangan, u mashinadan chiqib ketayotganida uni tushirib qoldirgan. Jinoyatchi Uoterberilik 22 yoshli Dion Shontten ekanligi aniqlangan, u hibsga olingan va transport vositasini o‘g‘irlashda ayblangan.

Uning sherigi 19 yoshli Kion Vebster ham hibsga olingan. Tergov natijalariga ko‘ra, ikkala gumondor ham o‘g‘irlangan mashinani navbatma-navbat boshqargan. Uoterberi politsiyasi boshlig‘i Fernando Spanoloning ta’kidlashicha, Vebsterda allaqachon avtoulovlarni o‘g‘irlash va boshqa jinoyatlar bilan bog‘liq yettita ayblov bor.

Qayd etilishicha, avtomobil egasi salonda qoldirgan naushniklar avtomobil o‘g‘risining iPhone qurilmasi yonida bo‘lgani tufayli ularning aniq geolokatsiyasini “Lokator” ilovasiga jo‘natishda yordam bergan, bu esa Ferrari avtomobilini topishga yordam bergan.