AQSh maxsus xizmatlari mamlakatning mudofaa korxonalarida qo‘poruvchilik harakatlari sodir etilishidan xavotirda

AQSh razvedka hamjamiyati AQSh harbiy-sanoat kompaniyalarini Rossiyaga aloqador shaxslar tomonidan qo‘poruvchilik tahdidi kuchayishi haqida ogohlantirdi. Bu haqda Bloomberg agentligi 21 noyabr, payshanba kuni AQSh Milliy razvedka direktori saytida e’lon qilingan ogohlantirishga tayanib xabar bergan.

Hujjat Rossiya prezidenti Vladimir Putin va boshqa Rossiya vakillarining tahdidlari fonida e’lon qilingan. Uzoq masofaga uchadigan G’arb qurollarining Rossiya Federatsiyasi hududiga bergan zarbalariga javoban Rossiyaning o‘rta masofali raketasi bilan Ukrainaga berilgan zarbasiga bag‘ishlangan videomurojaatida Putin, Moskva Ukraina harbiylari Rossiyaga zarba berish uchun foydalanadigan qurollar qaysi davlatniki bo‘lsa, o‘sha davlatlarning harbiy nishonlariga zarba berish huquqini o‘zida saqlab qolishini aytgan. Bu davlatlar orasida AQSh ham bor.

Mudofaa kompaniyalarining xodimlarini yollash 

AQSh razvedka hamjamiyatining hisobotida aytilishicha, Rossiya razvedka idoralari mudofaa xodimlari orasidan “insayderlar”ni va qo‘poruvchilik harakatlarini amalga oshirish uchun uchinchi shaxslarni yollashi mumkin. AQSh razvedka idoralari Yevropaning bir qancha davlatlarida Rossiya bilan aloqador shaxslar tomonidan sodir etilgan bir qator qo‘poruvchilik harakatlariga ishora qiladi.

“Rossiyaning Yevropadagi qo‘poruvchilik harakati xorijdagi va potentsial AQShning o‘zida Amerika kompaniyalari uchun xavfni oshiradi”, – deydi razvedka agentliklari.

Putin 21 noyabr kuni Rossiya harbiylari Dneprdagi harbiy-sanoat kompleksi ob’ektiga yadrosiz gipertovushli ballistik raketa bilan hujum qilganini aytadi. Uning so‘zlariga ko‘ra, bu o‘rta masofaga mo‘ljallangan eng yangi “Oreshnik” ballistik raketalaridan biridir. Rossiya ilgari bu qurollarni Ukrainaga qarshi urushda ishlatmagan va ularning mavjudligini e’lon qilmagan. Bir qator ekspertlarning fikricha, so‘z “Rubej” raketa tizimi asosida yaratilgan, 6000 kilometrgacha uchadigan raketa haqida bormoqda.