Bloomberg: NATO bosh kotibi Ukrainaga 100 mlrd dollarlik yordam jamg‘armasini yaratish rejasidan voz kechishi mumkin

NATO bosh kotibi Yens Stoltenberg Ukrainaga besh yilga mo‘ljallangan va qiymati 100 milliard dollar bo‘lgan harbiy yordam fondini yaratish rejasidan voz kechishi mumkin. Bu haqda Bloomberg xabar beradi. Stoltenberg alyans a’zolarining qarshiliklariga duch keldi, deydi nashrga vaziyatdan xabardor manbalar.

Yangi taklifga ko‘ra, NATO davlatlari Ukrainaga halokatli va halokatsiz yordam uchun yiliga kamida 40 milliard yevro (43 milliard dollar) sarflash majburiyatini oladi. May oyi oxirida Pragada bo‘lib o‘tgan NATO tashqi ishlar vazirlarining yig‘ilishidan so‘ng, Stoltenberg NATO Ukrainaga har yili kamida hozirgi darajada – yiliga taxminan 40 milliard dollar, 2022-yildan boshlab o‘rtacha yillik yordam ko‘rsatishi kerakligini aytdi.

Taklif kelasi hafta NATOga a’zo davlatlar mudofaa vazirlarining Bryusseldagi yig‘ilishida muhokama qilinadi. NATO har bir mamlakat uchun uning yalpi ichki mahsulotga qarab miqdorlarni belgilashi kutilmoqda, barcha moliyalashtirishning yarmi Qo‘shma Shtatlarga to‘g‘ri kelmoqda.

NATO yangi reja Kiyevga yaqin yillardagi yordam darajasini oldindan aytish imkonini beradi, degan umidda. Bloomberg agentligining qayd etishicha, alyans noyabr oyida Donald Tramp qayta saylanishi mumkinligi va buning Ukrainani moliyalashtirishdagi oqibatlaridan xavotirda.

Bloomberg suhbatdoshlarining qayd etishicha, bu taklif deyarli barcha ittifoqchilar tomonidan qo‘llab-quvvatlangan. Vengriya Bosh vaziri Viktor Orban Ukrainani qo‘llab-quvvatlashni kuchaytirishga qarshi.

Avvalroq Stoltenberg alyansga besh yil muddatga 100 milliard dollarlik hissa qo‘shish rejasini taqdim etgan edi, biroq ittifoqchilar loyihani shubha bilan qarshi olishgandi.