Koloniyadan yollangan rossiyalik askar 10 nafar xizmatdoshini otib tashlab, frontdan qochib ketdi

Ukraina bilan urushga yollangan sobiq rossiyalik mahbus Maksim Fedorchenko o‘n nafar xizmatdoshini uxlab yotgan paytida otib o‘ldirdi, shundan so‘ng qochib ketdi, deya xabar beradi “Dosуe shpiona” telegram-kanali.

Qirg‘in 26-oktyabr kuni Zaporojуe oblasti Novopokrovka qishlog‘i yaqinida sodir bo‘lgan. Ma’lumotlarga ko‘ra, “Barabash” pozivnoyiga ega 33 yoshli Fedorchenko 38-alohida motoo‘qchi brigadasining (21720-harbiy qism) 2-hujum kompaniyasida xizmat qilgan. Pozitsiyaga soat 03:30 da yetib kelgach, u o‘z bo‘linmasi askarlari joylashgan blindajga RGD-5 granatasini uloqtirgan, so‘ng ularga AK-74 rusumli avtomatdan o‘t ochgan. Qotillikdan keyin oddiy askar Pologi shahri tomon qochib ketgan. 28-oktyabr holatiga ko‘ra, uni qidirish ishlari davom ettirilgan.

Fedorchenko Primorsk o‘lkasining Barabash qishlog‘ida tug‘ilgan. Oilali, farzandi yo‘q. Rossiya Ukrainaga bostirib kirishidan oldin u armiyada xizmat qilmagan va jangovar harakatlarda qatnashmagan. Shuningdek, Fedorchenko qasddan sog‘liqqa og‘ir va yengil zarar yetkazganlik uchun qamoqda bo‘lganligi (Jinoyat kodeksining 111-moddasi 2-qismi va 115-moddasi 2-qismi) ma’lum. Umuman olganda, u 4,5 yilga qattiq tartibli koloniyaga hukm qilingan. Jazoni Ussuriyskda o‘tagan.

Rossiyalik harbiylarning o‘z hamkasblari tomonidan o‘ldirilishi voqeasi bir hafta ichida ikkinchisi bo‘ldi, deb yozadi kanal. 25-oktyabr kuni Kursk oblastining Kremyanoуe qishlog‘i yaqinida oddiy askar Aleksandr Ryabov 810-alohida dengiz piyoda brigadasi (13140-harbiy qism) 2-motoo‘qchilar bataloni komandirining o‘rinbosari kapitan Dmitriy Slepnyovning boshiga uch marta o‘q uzgan. Manbalarga ko‘ra, kuzatuv postidagi rasmiy uchrashuv chog‘ida kapitan ko‘rsatilgan qo‘l ostidagi xodim bilan og‘zaki janjal qilgan, shundan so‘ng uni AK-74 bilan o‘ldirgan.