Кремль Шимолий Корея Россия қўшинларини қўллаб-қувватлаш учун Украинага аскар юборгани ҳақидаги хабарларни рад этмоқда. Кремль матбуот котиби Дмитрий Песков уларни “сохта хабар” деб атади. Пайшанба куни Британиянинг “Гардиан” газетаси Киев ва Сеул расмийларига таяниб, КХДР ўзининг техник мутахассисларини Россия ҳарбийларига Шимолий Корея ракеталарига техник хизмат кўрсатишга ёрдам бериш учун юборганини маълум қилганди. Шунингдек, газета шимолий кореялик бир неча мутахассис ҳалок бўлганини ҳам хабар қилган. Москва Шимолий Корея қуролларидан фойдаланаётганини рад этади. Бироқ январь ойида АҚШ Миллий хавфсизлик хизмати матбуот котиби Жон Кирби Россия Украинадаги нишонларни ўққа тутиш учун Шимолий Кореяда ишлаб чиқарилган баллистик ракеталардан фойдаланаётгани ва умумий ҳисобда, АҚШ маълумотларига кўра, Шимолий Кореядан Россияга 16 минг контейнердан ортиқ ўқ-дорилар юборилганини айтди. Украина ҳарбийлари, шунингдек, баъзи ракеталар қолдиқларидан корейсча ҳарфлар топилганини ҳам хабар қилган.

Kreml Shimoliy Koreya Rossiya qo‘shinlarini qo‘llab-quvvatlash uchun Ukrainaga askar yuborgani haqidagi xabarlarni rad etmoqda. Kreml matbuot kotibi Dmitriy Peskov ularni “soxta xabar” deb atadi.

Payshanba kuni Britaniyaning “Gardian” gazetasi Kiev va Seul rasmiylariga tayanib, KXDR o‘zining texnik mutaxassislarini Rossiya harbiylariga Shimoliy Koreya raketalariga texnik xizmat ko‘rsatishga yordam berish uchun yuborganini ma’lum qilgandi. Shuningdek, gazeta shimoliy koreyalik bir necha mutaxassis halok bo‘lganini ham xabar qilgan.

Moskva Shimoliy Koreya qurollaridan foydalanayotganini rad etadi. Biroq yanvar oyida AQSh Milliy xavfsizlik xizmati matbuot kotibi Jon Kirbi Rossiya Ukrainadagi nishonlarni o‘qqa tutish uchun Shimoliy Koreyada ishlab chiqarilgan ballistik raketalardan foydalanayotgani va umumiy hisobda, AQSh ma’lumotlariga ko‘ra, Shimoliy Koreyadan Rossiyaga 16 ming konteynerdan ortiq o‘q-dorilar yuborilganini aytdi.

Ukraina harbiylari, shuningdek, ba’zi raketalar qoldiqlaridan koreyscha harflar topilganini ham xabar qilgan.