Putin birinchi marta Navalniyning nomini tilga oldi. Va uni ayirboshlashga rozi bo‘lganini aytdi

Vladimir Putin Rossiya prezidenti saylovi yakunlari bo‘yicha matbuot anjumanida birinchi marta Aleksey Navalniyning ismini tilga oldi, deb yozadi Meduza. U muxolifatchining o‘limini “qayg‘uli hodisa” deb atadi.

“Janob Navalniyga kelsak. Ha, u hayotdan ko‘z yumdi. Bu qayg‘uli voqea. Bizda ozodlikdan mahrum etish joylarida odamlar hayotdan ko‘z yumishi bo‘yicha voqealar avval ham kuzatilgan. AQSHda bunaqa bo‘lmagan, deysizmi? Ko‘p bo‘lgan”, — dedi Putin.

Shuningdek, u Navalniyni ayirboshlashga rozi bo‘lganini aytdi.

“Kezi kelganida aytishim kerakki, Navalniy hayotdan ko‘z yumishidan bir necha kun avvalroq menga ba’zi hamkasblarim — ular administratsiya xodimlari emas — janob Navalniyni G‘arb mamlakatlarida ozodlikdan mahrum etish muassasalarida bo‘lgan ba’zi odamlarga ayirboshlash g‘oyasi borligini aytgandi. Balki menga ishonmassiz, lekin men suhbatlashgan odam gaplarini tugatar-tugatmas, “roziman” dedim. Afsuski, bunaqa voqea bo‘lib qoldi. Men bitta shart bilan rozi bo‘lgandim: mayli, ayirboshlaymiz, lekin u qaytib kelmasin, o‘sha yoqda o‘tirsin, degandim. Ammo nima ham derdik, shunaqasiyam bo‘lib turadi”, — dedi Putin.

Eslatib o‘tamiz, 16-fevral kuni Rossiya Jazolarni ijro etish federal xizmati Aleksey Navalniy koloniyada vafot etganini ma’lum qildi. Siyosatchining safdoshlari uni o‘ldirishganini aytmoqda. Navalniyning onasiga berilgan o‘lim haqidagi xulosada u tabiiy sabablardan ko‘z yumgani qayd etilgan.