Rossiyada IIV ofisini portlatish bilan tahdid qilgan o‘zbekistonlik fuqaro qo‘lga olindi

Sankt-Peterburgda Ichki ishlar vazirligining patent berish idorasini portlatib yuborish bilan tahdid qilgan O‘zbekiston fuqarosi qo‘lga olindi. Bu haqda “Komsomolskaya pravda” xabar beradi.

Voqea 3-iyun kuni sodir bo‘lgan. Politsiyaga noma’lum shaxs Moiseyenko ko‘chasidagi binoni portlatib yubormoqchi ekani haqida xabar kelib tushgan.

Ma’lum qilinishicha, huquq-tartibot idoralarining xodimlari bino va uning atrofini ko‘zdan kechirib, xavfli hech nima topmagan. Hech qanday evakuatsiya amalga oshirilmagan.

Keyinchalik yolg‘on tahdid 2-may kuni Rossiyaga ishlash maqsadida kelgan 35 yoshli ishsiz o‘zbekistonlik tomonidan yuborilgani ma’lum bo‘lgan.

Erkak qo‘lga olinib, unga nisbatan terrorchilik harakati haqida yolg‘on xabar berish moddasi bo‘yicha jinoyat ishi qo‘zg‘atilgan.