Stefanchuk Ukrainadagi prezident saylovlari muddatlari haqidagi axborotni rad etdi

Yaqinda Polshaning Onet nashriga bergan intervyusida ukrainalik deputat Nikolay Stefanchuk yaqin olti-to‘qqiz oy ichida Ukrainada prezidentlik saylovlari o‘tkazilishi mumkinligini ma’lum qilgandi. U, shuningdek, Ukrainaning Rossiya ustidan g‘alaba qozonishi va barcha bosib olingan hududlar, jumladan Qrim va Donbass qaytarilishi, shuningdek, Rossiya tomonidan tovon puli to‘lanishiga ishonch bildirgandi.

Biroq keyinroq Stefanchuk polshalik jurnalist Marsin Virvalning maqolasida chop etilgan ma’lumotni rad etib, unga qarshi “yolg‘on axborot hujumi” boshlanganini aytgan. U hech qachon “restorandagi kechki ovqatlarda” saylovlar muddati haqida gapirmaganini va harbiy holat paytida saylovlar haqida gap-so‘z bo‘lishi mumkin emasligini ta’kidladi.

“Ukrainada harbiy holat joriy qilinar ekan, saylovlar mavzusida hech qanday manipulyatsiya yoki spekulyatsiya bo‘lishi mumkin emas”, – deya ta’kidlaydi xalq deputati. Uning qo‘shimcha qilishicha, saylov jarayonini faqat Ukraina g‘alabasidan keyin muhokama qilish mumkin.