Тошкент шаҳридаги 7 та туманда кўчалар номи ўзгарди

Халқ депутатлари Тошкент шаҳар кенгашининг 2 июндаги қарорига асосан Тошкент шаҳридаги 7 та туманда кўчаларнинг номларига ўзгартиришлар киритилди.
Мазкур қарорга кўра, Бектемир, Яшнобод, Олмазор, Учтепа, Юнусобод, Сергели ва Яккасарой туманларидаги баъзи жой, кўчаларга янги ном берилган ва қайта номланган.

Жумладан, Бектемир туманидаги Бардонкўл кўчаси Мажнунтол кўчаси деб қайта номланди. Яшнобод туманидаги Паҳлавон Маҳмуд-2 тор кўчаси — Паҳлавон Маҳмуд кўчаси, М.Мусахонов 1-тор кўчаси —Паҳлавон Маҳмуд тор кўчаси ҳамда М.Мусахонов 1 ва 2-берк кўчалари — Паҳлавон Маҳмуд 1 ва 2-берк кўчалари дея қайта номланди.

Олмазор туманидаги Янги тор кўчалар Чуқурсой 6-7-8- тор кўчаси ва Норазтепа 5-6-7-8-тор кўчаси деб номланди.

Учтепа туманидаги Туятортар кўчаси Кўкча Оқтепа кўчаси деб қайта номланди.

Юнусобод туманидаги Боғишамол ва Янгишаҳар кўчалари оралиғидаги янги кўчага Янгишаҳар кўчаси ҳамда Дўрмон йўли ва Боғишамол кўчалари оралиғида ташкил топган кўчага Дўрмон йўли кўчаси деб ном берилди. Шунингдек, Аҳроробод 2-берк кўчаси Аҳроробод тор кўчаси деб номланди.

Сергели туманидаги Янги тор кўчаларга Саватчи 2-3-4-5-6-тор кўча, Шоҳруҳия кўчасига Само кўчаси, Янги берк кўчаларга Само 1-2-берк кўчаси, Ҳамза кўчаси Фаввора кўчаси деб номланди.

Қўйлиқ-6 даҳасидаги янги кўчага Нуфузли кўчаси дея ном берилган («Қўшқўрғон» маҳалласи). Сайфи Олимов 1-берк кўчаси Қумариқ 4-берк кўчаси дея қайта номланган (туташ кўча номлари уйғунлаштирилган).

Яккасарой туманидаги Фозилота қабристони Яккасарой қабристони деб аталадиган бўлган.

Манба: Спутник