6 апрель куни Олий Мажлис Қонунчилик палатасининг йиғилиши ўтказилди, унда депутатлар Ҳисоб палатасининг 2020 йил учун ҳисоботини кўриб чиқди, дея хабар беради “Дунё” нашри.
 
2020 йилда Ҳисоб палатаси 671,3 млрд сўмлик ноқонуний харажатларни, танқисликни, талон-тарожликларни ҳамда чиқимларни 1 трлн сўмга оптималлаштириш имкониятини аниқлади.

Ҳисоб палатаси 87 та назорат тадбирини ва таҳлилий ўрганишларни ўтказган.
 
Бундан ташқари, Инқирозга қарши курашиш жамғармасининг 23,8 млрд сўм миқдоридаги камомадлари ва ноқонуний харажатлари аниқланган, қайта молиялаштирилган 8,4 млрд сўм жамғармага қайтарилган.

Йиғилишда халқ таълими вазирлиги муассасаларида 192,2 млрд сўмлик молиявий хатолар, камомадлар ва талон-тарожликлар аниқлангани қайд этилди. Хусусан, халқ таълими соҳасидаги ислоҳотларга кўмаклашиш жамғармасидан 21 млрд сўм маблағни самарасиз сарафлаш аниқланган. Беруний туманидаги 58-сонли мактаб филиалида 420 млн сўмлик қурилиш ва фойдаланишга топшириш ишлари амалга оширилмаган.

Депутатлар халқаро молиявий институтлар томонидан молиялаштирилаётган лойиҳаларда муаммолар мавжудлигига эътибор қаратди. Хусусан, 2010-2019 йилларда давлат ташқи қарзини жалб этган ҳолда якунланган қиймати 12,6 млрд долларлик 81 та лойиҳадан 24 тасида хатоликлар ва камчиликлар аниқланган.