Капитал бозорини ривожлантириш агентлигининг вазифалари Молия вазирлигига топширилди

Капитал бозорини ривожлантириш агентлиги (КБРА) тугатилмоқда, унинг барча ваколатлари, функция, вазифалари ва мол-мулки Молия вазирлигига ўтказиляпти.  Бу 3 апрель куни президент томонидан имзоланган «Давлат ҳокимияти ва бошқаруви органларининг тузилмасини мақбуллаштиришни ва штат бирликлари сонини қисқартириш тўғрисида"ги қарорда назарда тутилган, деб ёзади “Газета” нашри.
 
Қарорда Молия вазирлиги ҳамда манфаатдор вазирлик ва идораларга бир ой муддатда қуйидагиларни назарда тутувчи президент ҳужжати лойиҳасини киритиш топширилди:

·         Капитал бозорини ривожлантириш агентлигининг ваколатлари, ҳуқуқ ва мажбуриятлари ҳамда мол-мулкини Молия вазирлигига ўтказиш;
·         Агентликнинг халқаро молия институтлари ва хорижий ҳукумат молия ташкилотлари иштирокидаги лойиҳаларини, улар билан келишилган ҳолда, кейинчалик амалга ошириш механизмини белгилаш;
·         Капитал бозорини ривожлантириш агентлигининг ваколатлари Молия вазирлигига ўтказилиши ҳисобига унинг фаолиятини кенгайтириш.
Эслатиб ўтамиз, Капитал бозорини ривожлантириш агентлиги 2019 йил январь ойида ташкил этилган эди..

Сал аввалроқ Anhor.uz нашрининг иқтисодий шарҳловчиси Абдулла Абдуқодиров Ўзбекистонда капитал бозорини ривожлантиришнинг асосий муаммолари ҳақида ёзганди.

Бош саҳифадаги фотосурат: Молия вазирлигининг матбуот хизмати