Прокуратура Самарқанддаги Минск хиёбонида олиб борилаётган ноқонуний қурилиш бўйича жиноят иши қўзғатди

Самарқанд вилоят маъмурияти томонидан прокуратурага тақдим этилган Минск хиёбонида “Таунхаус” услубида уй-жой, болалар боғчалари ва тижорат бинолари қурилишига рухсатномалар мақоми ҳақидаги ҳужжатлар ўрганилди. Бу ҳақда Samcity нашри Самарқанд вилоят прокуратураси матбуот хизматига таянган ҳолда ёзади.

 
Аввалроқ ижтимоий тармоқларда «Меҳр Нур Омад Барака» МЧЖ компанияси томонидан “Тошкент”, “Давлатшох Самарқандий”, “Огоҳий” (“Минск” хиёбони) маҳаллалари ҳудудида “Таунхаус” услубидаги биноларнинг ноқонуний қурилиши бошлангани ҳақидаги хабарлар тарқалганди. Қурилиш ишлари 2020 йилда бошланган.
 
Вилоят прокуратураси томонидан ўтказилган тергов давомида ушбу манзил бўйича қурилишга рухсатнома ҳақидаги ҳужжатларнинг қалбакилаштирилиши факти бўйича Жиноят кодексининг тегишли моддалари бўйича жиноят иши қўзғатилган. Тергов тафсилотлари келтирилмаган.