Транспорт вазирлиги авиачипталар харид қилмасликка чақирди

Ўзбекистон Республикаси Транспорт вазирлиги халқаро ҳаво қатновини тиклаш бўйича ишлар тугалланмаганига расмий равишда изоҳ берди, деб ёзади “Дунё” АА.

Вазирлик сўнгги кунларда жорий йилнинг 1 июлидан бошлаб баъзи хорижий авиакомпанияларнинг Ўзбекистонга мунтазам рейслари тикланиши ҳақидаги хабарларга шундай муносабат билдирди. Муассаса Республика махсус комиссиясининг қарори билан мамлакатда карантин чекловлари 1 августгача узайтирилгани ва халқаро ҳаво қатновини тиклаш бўйича олиб борилаётган ишлар ҳали якунига етмаганини эслатди.

«Турли авиакомпанияларнинг Ўзбекистонга мунтазам парвозларни бошлаши тўғрисида тарақалаётган расман тасдиқланмаган хабарларга ишониб, авиачипталарни сотиб олманг. – дейилади вазирлик хабарида. – Мунтазам рейслар тиклангунга қадар фақат Республика махсус комиссияси томонидан тасдиқланган парвозлар жадвалига мувофиқ чартер рейсларигина амалга оширилади».