11 мингдан ортиқ объект белгиланган нормаларга тўғри келмагани учун фойдаланишга киритишга рад этилди

Қурилиш ва уй-жой коммунал хизмат кўрсатиш вазирлигининг матбуот котиби Саидносир Усмонов 9 февраль куни бўлиб ўтган брифингда аҳолинингЎзбекистонда қурилаётган уйларнинг сифати ва сейсмик бардошига оид саволларига жавоб беришга ҳаракат қилди. Бу ҳақда «Газета.uz» ёзади.

Унинг қайд этишича, Ўзбекистон ҳудуди сейсмиклик кўлами бўйича зоналарга бўлинган. Шунинг учун бош режаларда объектларни жойлаштиришда ҳудудларнинг сейсмиклик кўрсаткичлари ҳисобга олинади.

Вазирлик вакилининг сўзларига кўра, муайян объектнинг лойиҳасини тайёрлаш учун аввало архитектура-режалаштириш топшириқлари ишлаб чиқилади, сўнгра лойиҳа таклифи архитектура кенгашида кўриб чиқилади. Лойиҳа ташкилотлари объектларни ҳудуднинг белгиланган сейсмик балли асосида лойиҳалаштиради.

Бундан ташқари, объектни лойиҳалашдан олдин у жойлашган ерни топографик суратга олиш ва геологик ўрганиш, шунингдек, тупроқнинг таркиби ва хусусиятлари, ер ости сувлари даражаси ва бошқа масалалар ўрганилади.

Тадқиқотлар натижаларига кўра, объектнинг жойлашиши, унинг қаватлари сони, пойдевори, тузилиши ва умумий параметрлари бўйича дизайн ечимлари танланади. Шундан сўнг, лойиҳа ҳужжатлари ишлаб чиқилади.

Шу билан бирга, Саидносир Усмоновнинг сўзларига кўра, “сейсмик хавфсизлик ва барқарорликни таъминлашга қаратилган шаҳарсозлик нормалари ва қоидаларига қатъий риоя қилинади” (қурилиш нормалари ва қоидалари – 3.02.01-97, 2.02.01-98 ва 2.01.03-19).

Кейин объектнинг лойиҳа ҳужжатлари ваколатли эксперт ташкилотлари томонидан кўриб чиқилади. Сейсмик хавфсизлик ва барқарорлик масалалари алоҳида ўрганилади. Тўртинчи даражали мураккабликдаги объектлар (электр станциялари, нефть ва газ саноати объектлари) қўшимча равишда Фанлар академияси Сейсмология институтида сейсмик экспертизадан ўтказилади, дея таъкидлади Қурилиш вазирлиги матбуот котиби.

Қурилиш ишларига рухсатнома объектни лойиҳалашда сейсмик хавфсизлик ва мустаҳкамлик масалалари тўлиқ ҳисобга олингани тўғрисида ижобий эксперт хулосалари олинганидан кейин берилади, дейди Саидносир Усмонов.

Унинг сўзларига кўра, объектларни қуриш жараёнида тўрт хил турдаги назорат ишлари амалга оширилади: пудратчининг ички назорати, лойиҳалаш ташкилотининг муаллифлик назорати, буюртмачи ташкилотнинг техник назорати ва инспекциянинг давлат назорати.

Қурилиш ва уй-жой коммунал хўжалигини назорат қилиш инспекциясида қурилиш материаллари, конструкциялари ва маҳсулотлари махсус лабораторияларда ҳам синовдан ўтказилади.

Инспекция томонидан “Қурилишда давлат назорати” ахборот тизими яратилиб, ишга туширилди. Унинг таркибига 30823 та қурилиш объекти кирган бўлиб, уларда назорат ишлари олиб борилмоқда.

“Аммо, таъкидлаш жоизки, инспекция томонидан ўтган йили архитектура соҳасида ўтказилган текширишлар натижасида 6 минг 102 та ноқонуний қурилма аниқланган. Қурилиш-монтаж ишлари якунланган бино ва иншоотлардан фойдаланишга рухсат олиш учун 16 576 та ариза келиб тушган. Шу билан бирга, 11 162 та объектни фойдаланишга топшириш белгиланган меъёрларга мос келмаслиги сабабли қатъиян рад этилган», – дейди Қурилиш вазирлигининг матбуот котиби.