Аэропортда 37 ёшли аёл вафот этганлиги тўғрисидаги хабар ёлғон бўлиб чиқди

Ижтимоий тармоқларда 37 ёшли аёл “томожний” текширувини кутаётган пайтда вафот этганлиги тўғрисидаги хабарлар тарқалди. Масъуллар ушбу ҳолатга расмий муносабат билдирди.

“Uzbekistan Airports”нинг хабар қилишича, 7 октабрь куни Тошкент вақти билан соат 17:34 да Тошкент халқаро аэропорти тиббиёт пунктига йўловчининг учиб келиш залида ўзини ёмон ҳис қилаётгани ҳақида хабар келиб тушган. ҲЙ-334 Дубай – Тошкент рейси билан келган 1986 йилда туғилган Ўзбекистон фуқароси паспорт назоратидан ўтгач дарҳол ёрдам сўраган. Йўловчи бош оғриғи ва ўзини ёмон ҳис қилаётганидан шикоят қилган.

Йўловчи шикоятлари ва у билан бирга учиб келган шахсларнинг сўзларини инобатга олган ҳолда аэропорт тиббиёт пункти ходимлари биринчи тиббий ёрдам кўрсатиб, касалхонага ётқизиш учун шаҳар тез ёрдам хизматини чақиришган.

Соат 18:32 да тез ёрдам машинаси йўловчини Тошкент аэропортининг учиб келиш залидан Республика шошилинч тиббий ёрдам илмий марказига олиб кетган.

Шунингдек, Бош Прокуратура матбуот котиби Хаёт Шамсутдинов ҳам ушбу ҳолатга муносабат билдирди: “Аэропортда бир аёл вафот этганлиги ҳақидаги хабарлар  мутлақо ҳақиқатга тўғри келмайди. Бугун, 8-октабр куни Дубаи-Тошкент авиарейсида учиб келган, 1986 йилда туғилган аёлнинг соғлиғи ёмонлашган. Ҳозирда аёл шифохонага ётқизилиб, унга зарур тиббий ёрдам кўрсатилмоқда”.