Тошкент шаҳар ҳокимлигида Alibaba.com билан ҳамкорлик истиқболлари муҳокама қилинди

30 июль куни Тошкент шаҳар ҳокимлигида халқаро ҳамкорликни ривожлантириш ва инвестицияларни жалб этишга қаратилган учрашув бўлиб ўтди. Бу ҳақда ҳокимлик матбуот хизмати хабар бермоқда.

Учрашувда Тошкент шаҳар инвестициялар, саноат ва савдо бошқармаси бошлиғининг биринчи ўринбосари Азизхон Шавкатов, “Тошкент Инвест Компанияси” АЖ стратегик масалалар бўйича директори Рустам Қодиров, шунингдек, “Alibaba.com” корпорациясининг глобал бизнесни ривожлантириш департаменти раҳбари Чжоу Дэниел, “NEOUZ Global Service Partner of Alibaba.com” компаниясининг Ўзбекистондаги молиявий директори Шуҳрат Тўхтаев, “Alibaba.com” компаниясининг Марказий Осиё бўйича минтақавий вакили Элбек Холматов иштирок этди.

Азизхон Шавкатов Тошкентдаги қулай инвестиция муҳити ҳақида батафсил тўхталиб, сўнгги йилларда инвестициялар ва экспорт ҳажми сезиларли ўсганини таъкидлади. У таклифларни эшитиш ва ўзаро ҳамкорликни ривожлантиришга кўмаклашишга тайёрлигини билдирди.

Ўз навбатида, Чжоу Дэниел “Alibaba.com”нинг имкониятлари ва салоҳиятини тақдим этди, шунингдек, Ўзбекистон бозорига чиқишдан манфаатдорлигини билдирди.

Учрашувда томонлар ўзаро манфаатдорлик ва узоқ муддатли ҳамкорлик истиқболларини ифодаловчи мулоқотни давом эттиришга келишиб олдилар.