Ҳарбий прокуратура Тошкент вилоятида муддатли ҳарбий хизматни ўтаётган аскарнинг ўлимини ўз жонига қасд қилиш сифатида тан олди

Тошкент шаҳар ҳарбий прокуратураси жорий йилнинг январь ойида ҳарбий қисмда ҳалок бўлган муддатли ҳарбий хизматчи Миржалол Имомов ўз жонига қасд қилганини тан олди. Шундай қилиб, тергов ушбу факт бўйича жиноят таркиби йўқлиги сабабли жиноят ишини қўзғатишдан бош тортган, деб ёзади “Медиазона” Ўзбекистон Бош прокуратураси матбуот хизматига таянган ҳолда.

Тергов маълумотларига кўра, 11 январь куни соат 10:00 ларда Имомов ҳарбий қисмнинг дам олиш хонасига кириб, у ерда қурол жавонидан навбатчи сержантнинг жанговар автоматини топиб олган, сўнгра аскар ўзининг жағига отиб ўз жонига қасд қилган.

Тошкент шаҳар ҳарбий прокуратураси томонидан тергов материаллари ва экспертиза натижалари ўрганилиб, муддатли ҳарбий хизматчи ҳалок бўлган ҳарбий қисмда кийим-кечак ва қурол-яроғни қабул қилиш ва топширишда камчиликлар аниқланган. Шу муносабат билан Тошкент ҳарбий округи қўмондонлигига тегишли ҳисобот тақдим этилган.

Тошкент вилоятининг Зангиота туманида жойлашган ҳарбий қисмда юз берган воқеа 17 январь куни маълум бўлди. Расмий маълумотларга кўра, 20 ёшли аскар бахтсиз ҳодиса натижасида ўзини отиб ўлдирган.

Аммо Имомовнинг қариндошлари ўз жонига қасд қилиш ҳақидаги версияга ишонишмади, чунки уларнинг сўзларига кўра, аскарнинг танасида калтакланиш излари топилган: қош устида зарбадан қолган кўкариш, кўз остидаги кўкариш ва иккита синган тиш. Бундан ташқари, марҳумнинг онаси ўғлининг ўлимига алоқадорликда унинг бир нечта хизматдоши ҳибсга олинганини таъкидлаган.