Қаршидан Москвага учаётган самолёт мажбурий қўндирилди

Қаршидан Москвага учаётган “Уральские авиалинии” самолёти Екатеринбургдаги Кольцово аэропортига фавқулодда қўнди. Бунга гидравлик тизимлардан биридаги датчикнинг носозлиги сабаб бўлган, дея хабар беради авиакомпания матбуот хизмати.

“Қарши (Ўзбекистон) – Москва йўналиши бўйича U6-2128 рейсини амалга ошираётган самолёт бортида гидравлик тизимлардан бирида носозлик сенсори ишга тушган. Хавфсиз парвозни таъминлаш учун самолёт командири Кольцово захира аэродромига учишга қарор қилган. Қўниш муваффақиятли бўлди”, — дейилади хабарда.

“Уральские авиалинии” йўловчи ташиш бўйича Россиянинг етакчи авиакомпанияларидан бири бўлиб, унинг ҳаво флоти Airbus концернининг самолётларидан иборат.