Бошпанасиз ҳайвонларни ким кимёвий моддалар билан заҳарламоқда

2022 йилдан буён «Ҳаёт» нодавлат нотижорат ташкилоти ва «Мушуккент» лойиҳаси бошпанасиз ҳайвонларга нисбатан кучли таъсир қилувчи заҳарларнинг қўлланиши бўйича ўз текширувларини олиб бормоқда. Ташкилотлар Соғлиқни сақлаш вазирлигига хат йўллаган, вазирлик эса бошпанасиз ҳайвонларни ушлаш билан шуғулланадиган Тошкент ҳокимлиги ҳузуридаги Ободонлаштириш бошқармасига мурожаат қилишни тавсия этган. Anhor.uz таҳририяти бошқармага сўров йўллади. Улар бизга қуйидагича жавоб беришди:

“Ободонлаштириш бош бошқармасининг МАДХ қошидаги қаровсиз ҳайвонларни тутиш бўлими ўз фаолиятини Вазирлар Маҳкамасининг 2011 йил 8 июлдаги 202-сонли “Қаровсиз қолган ҳайвонларни тутиш ва сақлаш билан боғлиқ хизматлар фаолиятини такомиллаштириш чора-тадбирлари тўғрисида”ги қарорида белгиланган вазифалардан келиб чиққан ҳолда олиб боради.

Мазкур қарорга мувофиқ, қаровсиз ҳайвонларни тутиш бўлимларига қуйидагилар топширилган:

– кўчаларда ва бошқа жойларда қаровсиз қолган, шу жумладан, эгасиз итлар, мушуклар ва йиртқич ҳайвонларни тутишни ташкил этиш, шунингдек уларни вақтинча сақлаш учун махсус жойларни яратиш;

– одамлар ва ҳайвонларга шикаст етказган ёки уларга асоссиз ҳужум қилган ҳайвонларни кейинчалик карантин қилиш учун ветеринария ва чорвачиликни ривожлантириш бўлимларига етказиб бериш;

– тегишли ветеринария ва чорвачиликни ривожлантириш бўлимлари билан биргаликда ҳайвонларнинг қутуриши, шунингдек, ўлган ҳайвонларни ветеринария-санитария қоидаларига риоя қилган ҳолда зарарсизлантириш бўйича ишларини ташкил этиш”.

Ободонлаштириш бошқармаси, шунингдек, бошпанасиз ҳайвонларни тутиш учун ҳеч қандай кимёвий моддалар ишлатилмаслигини ва кимёвий заҳарлар учун давлат томонидан маблағ ажратилмаганини таъкидлади.

Шунга қарамай, ҳайвонларнинг заҳарланиши ҳолатлари давом этмоқда. Ижтимоий тармоқларда аҳолининг Шавкат Мирзиёевга мурожаати акс этган видеолавҳалар тарқалиб, уларда ушбу вазиятни аниқлаштириш ва зарур чораларни кўриш сўралган.