Буюк Британия санкцияларни четлаб ўтаётган компанияларнинг фаолиятига чек қўйиш билан шуғулланувчи бўлинмани ташкил қилмоқда

Душанба куни Британия ҳукумати санкцияларни четлаб ўтаётган компанияларни нишонга олиш учун ўз ваколатларини кенгайтириш мақсадида ҳуқуқни муҳофаза қилиш бўлинмасини яратаётганини маълум қилди. Бу ҳақда Reuters ёзади.

Савдо санкцияларини қўллаш бошқармаси (OTSI) савдо санкцияларининг фуқаролик ижроси, юзага келиши мумкин бўлган ҳуқуқбузарликларни текшириш, жарима солиш ва ишларни жиноий жавобгарликка тортиш учун жавобгар бўлади.

Ҳукуматнинг Бизнес ва савдо департаменти, шунингдек, корхоналарга санкцияларга риоя қилишда ёрдам беради ва маҳсулотларни бошқа мамлакатлар орқали жўнатиш орқали санкциялардан қочиб қутула оладиган ҳар қандай миллий ёки Буюк Британияда рўйхатдан ўтган компанияни қамраб олади.

Бўлим келаси йилнинг бошида ўз фаолиятини бошлайди ва мавжуд Молиявий санкцияларни амалга ошириш бўйича бошқарма билан бирга ишлайди.

“Биз (Россия президенти Владимир) Путиннинг уруш машинасини тўхтатишга интилишда қатъий турамиз. Бу санкциялардан бўйин товлаганларга қарши чоралар кўриш ва Россияни ноқонуний босқинчиликни давом эттириши учун зарур бўлган технология ва даромаддан маҳрум қилиш демакдир”, — дейди Буюк Британия саноат ва иқтисодий хавфсизлик вазирлиги.

Вазир Нусрат Ғани: “Бугунги эълон бизга бунга эришишга ёрдам беради ва қоидаларни бузганларга яширинишга жой йўқлигидан аниқ сигнал беради”, – деди.

Ўтган ҳафта Британия Россия санкцияларини четлаб ўтишга уринаётгани ҳақида огоҳлантирди ва Россия ҳарбий таъминот занжирларида иштирок этган бошқа мамлакатлардан келган шахслар ва гуруҳларга қарши 46 та янги чора эълон қилди. Ўзбекистон, Хитой, Туркия, Сербия, Бирлашган Араб Амирликларида фаолият юритаётган корхоналар шулар жумласидандир.