Eurasianet: Ислом Каримов оиласи билан алоқаларга эга биринчи хусусий авиакомпания

Биринчи хусусий авиакомпания келгуси ойдан ички ва халқаро рейсларни йўлга қўяди. Panorama Airways авиакомпанияси Ўзбекистон Фуқаролик авиацияси агентлигидан авиаоператор сертификатини олди, дейилади яқинда Instagram тармоғида эълон қилинган хабарда. Декабрдан бошлаб ички йўналишларда ҳамда Исроил, Россия, Саудия Арабистони, Жанубий Корея ва Бирлашган Араб Амирликлари каби давлатларга парвоз қила бошлайди. Бу ҳақда Eurasianet.org ёзади.

Ўтган йили ташкил этилган ва шу пайтга қадар авиачипталар сотиб келган компания рейсларни йўлга қўйишни бир неча ойга чўзди, дея қайд этади нашр.

Бироқ, Фуқаролик авиацияси агентлиги июнь ойида унга ҳаво оператори сертификатини берганини рад этганидан сўнг, унинг мақоми борасида бироз чалкашликлар пайдо бўлди.

Агентлик Panorama Airways компаниясининг мақомини тасдиқлаш ҳақидаги электрон почта сўровига жавоб бермади, бироқ авиакомпания ўзининг Instagram аккаунтида сертификат суратини жойлаштирган.

Panorama Airways компаниясининг билдиришича, 2021 йилда Президент Шавкат Мирзиёевнинг соҳада “рақобат муҳитини яратиш” сиёсати доирасида “Ўзбекистон Республикаси фуқаролик авиациясини либераллаштириш бўйича кенг кўламли лойиҳа доирасида” ташкил этилган.

Тижорат рейсларини амалга ошириш ҳозиргача давлат авиаташувчиси – “Ўзбекистон ҳаво йўллари” миллий авиакомпанияси ва 2020 йилда ташкил этилган Humo Air  бюджетли авиакомпаниясининг эксклюзив ваколати бўлиб келаётганди.

Panorama Airways ўз веб-сайтида мулк тузилишини кўрсатмаган ва авиакомпания Eurasianet.org сўровига жавоб бермаган.

“Ўзбекистон оммавий ахборот воситалари авиакомпаниянинг устав капитали эгаси сифатида «Панорама-Тур» агентлигига ҳам эгалик қилувчи Баҳора Қодировани кўрсатмоқда. “Ўзбекистон ҳаво йўллари” Миллий авиакомпаниясининг камида икки нафар собиқ топ-менежери янги авиакомпанияда юқори лавозимларда ишлаяпти”, – дея қайд этади нашр.

Сайтдаги маълумотларга кўра, компаниянинг ижрочи директори “Ўзбекистон ҳаво йўллари” МАК раисининг собиқ биринчи ўринбосари Азиз Сафиуллин.

Ўз вақтида “Ўзбекистон ҳаво йўллари”нинг Лондондаги ваколатхонасини бошқарган Алексей Яицкий маслаҳатчи сифатида қайд этилган.

“Бир пайтлар Яицкий Ислом Каримовнинг собиқ ҳукмрон оиласи билан алоқадор бўлганга ўхшайди. Яицкий Лола Каримова-Тиллаеванинг турмуш ўртоғи Тимур Тиллаевга тегишли фирмалар тармоғининг бир қисми бўлган Silk Road Cargo компаниясининг Дубайдаги вакили бўлган, дейилади Нидерландиянинг нотижорат журналистик тадқиқот сайти The Black Sea 2017 йилдаги ҳисоботида.

2014 йилда Яицкий Дубайда порахўрликда айбланиб ҳибсга олинган, бироқ кейинроқ қўйиб юборилган ва мамлакатни тарк этишига рухсат берилган.

Тиллаев адвокатининг нашрга айтишича, Яицкий “компания номидан иш қилмаган” ва шундан сўнг дарҳол ишдан бўшатилган. Хабарда айтилишича, у “Ўзбекистон ҳаво йўллари”нинг Лондондаги ваколатхонаси раҳбари бўлди.