Европарламентда Марказий Осиё бўйича янги резолюция муҳокама қилинади

17 январь куни Европарламентнинг Страсбургдаги сессиясида Марказий Осиё бўйича резолюция лойиҳаси бўйича овоз бериш бўлиб ўтади. Унинг асосий моҳияти минтақа давлатларини инсон ҳуқуқлари бўйича халқаро мажбуриятларни бажаришга чақиришдан иборат. Ҳужжат матни Европарламент сайтида эълон қилинган.

Қарор лойиҳасида, хусусан, инсон ҳуқуқларининг бузилиши, журналистлар, блогерлар, ҳуқуқ ҳимоячилари ва фуқаролик фаолларининг «экстремизм», “ёлғон маълумот тарқатиш” ва “нафрат қўзғатиш” каби айбловлар билан таъқиб қилинаётгани учун кенг кўламли жазосиз қолаётганидан хавотир билдирилган.

Ҳужжат, шунингдек, қийноқлар ва бошқа инсон ҳуқуқлари бузилиши ҳақидаги даъволарни мустақил ва ҳар томонлама текширишга чақиради.

Шунингдек, Европа Иттифоқининг Марказий Осиё мамлакатларидаги делегацияларини жойлардаги вазиятни фаол кузатиш, суд жараёнларида қатнашиш, ҳуқуқ ҳимоячилари билан ишлаш ва инсон ҳуқуқлари бузилиши ва сиёсий таъқибларга жавоб беришга, сиёсий маҳбусларни бориб кўришга чақиради.

Европа Иттифоқининг Марказий Осиё бўйича стратегияси 2007 йилда қабул қилинган дастлабки стратегия ўрнига 2019 йил июнь ойида қабул қилинган.

Янги резолюция лойиҳасида таъкидланишича, ўшандан буён минтақага “Россиянинг Украинага қарши уруши, Афғонистонни Толибон босиб олгани, Хитойнинг глобал амбициялари, шунингдек, ички беқарорлик каби муҳим ташқи омиллар” таъсир кўрсатган. Ҳужжатда Қозоғистонда 2022 йилнинг қонли январи, 2021 йил ноябрь ва 2022 йил май ойларида Тожикистоннинг Тоғли Бадахшон мухтор вилоятида ва 2022 йил июлида Ўзбекистоннинг Қорақалпоғистон Мухтор Республикасида ўтказилган норозилик намойишларидан кейинги ҳибслар, шунингдек, қирғиз-тожик чегарасидаги тўқнашувлар санаб ўтилган. .

Freedom House ташкилотининг 2023 йилда дунёда эркинлик ҳолати тўғрисидаги ҳисоботига кўра, Марказий Осиёнинг барча бешта давлати демократия бўйича паст ёки пасайиб бораётган давлатлар сифатида баҳоланади ва авторитар режимлар қаторига киради.